Jihova O Wo Odiri kẹ Jona

Ahwo okpẹwho Asiria nọ a re se Nanivi, a yoma gaga. Jihova ọ tẹ ta kẹ Jona ọruẹaro riẹ nọ o kpobọ Nanivi, re ọ vẹvẹ ahwo na unu inọ a nwene no idhere iyoma rai. Rekọ Jona ọ tẹ dhẹ rri obọfa. Ọ tẹ ruọ eva okọ nọ u bi kpobọ Tashish.

Nọ okọ na u bi te oria jọ no evaọ abade na, ofou ọgaga o te muhọ efou avọ ẹkporo nọ o bi fi, ozọ u te mu ahwo nọ a jọ evaọ okọ na. A tẹ lẹ se eghẹnẹ rai, inọ: ‘Fikieme oware utionana o be rọ via?’ Jona ọ tẹ ta kẹ ae nọ: ‘Mẹ mẹ be wha uye na ze na. Mẹ be dhẹ siọ oware nọ Jihova ọ ta nọ me ru ba. Wha gbolo omẹ fihọ abade na, ẹkporo na o ti serihọ.’ Ahwo nọ a je bi okọ na a jẹ rọwo gbolo Jona fihọ abade na ha, rekọ Jona nọ a gbolo iei fihọ abade na ghele. Nọ a gine gbolo iei fihọ abade na, ẹkporo na o te serihọ.

Jona o je roro nọ o ti whu. Nọ o bi kie diwi kpobọ otọ abade na, Jona ọ tẹ lẹ se Jihova. Jihova o te vi eri ologbo jọ ze. Eri na ọ tẹ lọ Jona, rekọ o whu hu. Jona ọ tẹ jọ eva eri na lẹ se Jihova, inọ: ‘No umuo enẹna vrẹ mẹ te hai yoẹme kẹ owhẹ ẹsikpobi.’ Jihova ọ sẹro uzuazọ Jona evaọ edẹ esa nọ ọ rọ jọ eva eri na, kẹsena o te ru nọ eri na ọ rọ kpa Jona fihọ okpa.

Nọ orọnọ Jihova o siwi Jona no na, kọ onana u dhesẹ nọ ọ te gbẹ nya uwou nọ Ọghẹnẹ o vi rie na ha? Ijo. Jihova ọ tẹ wariẹ ta kẹ Jona nọ o kpobọ Nanivi. Jona ọ tẹ ginẹ nya. Nọ o te obei, o te woro kẹ ahwo na nọ: ‘Edẹ udhuvẹ (40) e tẹ vrẹ no, a te raha Nanivi no.’ U gbunu kẹhẹ, ahwo Nanivi a tẹ gaviezọ kẹ ovuẹ Jona, a te kurẹriẹ no eware iyoma nọ a je ru na. Ovie Nanivi ọ tẹ ta kẹ ahwo riẹ nọ: ‘Wha bo se Ọghẹnẹ, re wha kurẹriẹ. Ẹsejọhọ ọ te re ohrọ mai.’ Nọ Jihova ọ ruẹ nọ ahwo na a kurẹriẹ no, ọ gbẹ raha Nanivi hi.

Eva e tẹ dha Jona gaga fikinọ Ọghẹnẹ ọ raha okpẹwho na ha. Dai roro iei: Jihova ọ re ohrọ Jona yọ o wo odiri kẹe, rekọ Jona o wo ohrọ-oriọ kẹ ahwo Nanivi hi. Ukpoye ọ tẹ nyae keria otọ edhedhẹ ure owhala jọ evaọ otafe okpẹwho na avọ ovao nọ o muhọ. Nọ uvo o rro ze, ure na u te whu no, eva e tẹ dha Jona gaga. Fikiere Jihova ọ tẹ ta kẹe nọ: ‘O be kẹ owhẹ uye nọ ure na u whu no, rekọ whọ gwọlọ nọ mẹ raha ahwo Nanivi no. Fikinọ mẹ re-ohrọ rai mẹ rọ kẹ ai uvẹ.’ Eme họ otọ ẹme Jihova na? Uzuazọ ahwo Nanivi o ghare vi ure na.