Oware Ovo O Whaha E Rai Usi Uwoma Ota Ha

U wo ọzae jọ nọ ọ ko nọ ọ jẹ hae keria unuẹthẹ etẹmpol na yare eware kẹdẹ kẹdẹ. Evaọ uvo ẹdẹ jọ nọ ọ ruẹ Pita avọ Jọn nọ a be rueva etẹmpol na, ọ tẹ ta kẹ ae nọ: ‘Ivie wha kẹ omẹ ugho.’ Pita ọ tẹ ta nọ: ‘Me wo oware jọ nọ u woma vi ugho nọ mẹ te kẹ owhẹ. Evaọ odẹ Jesu, kpama whọ nya!’ Pita o te kru ọzae na kpama, o te muhọ ẹnya! Iruo igbunu nana e were ogbotu na te epanọ ahwo buobu a ro kurẹriẹ.

Rekọ eva e tẹ dha izerẹ gbe ahwo Sadusi na gaga. A tẹ rehọ ikọ na kpohọ oria nọ a rẹ jọ guẹdhọ, a tẹ ta nọ: ‘Ono ọ kẹ owhai ogaga nọ wha ro siwi ọzae nana?’ Pita ọ tẹ ta nọ: ‘Jesu Kristi nọ wha kpe na ọye ọ kẹ omai ogaga na.’ Isu egagọ na a te doku ai nọ: ‘Wha gbẹ ta ẹme kpahe Jesu hu!’ Rekọ ikọ na a tẹ ta nọ: ‘Ma te ta ẹme kpahe iẹe, ma te seba ha.’

Nọ a nwani siobọno Pita avọ Jọn no, a tẹ nyabru ilele nọ i kiọkọ jẹ vuẹ ae eware kpobi nọ e via. A tẹ lẹ kugbe, jẹ yare Jihova inọ: ‘Fiobọhọ kẹ omai wo udu re ma gbẹ sai ru iruo ra.’ Jihova ọ tẹ kẹ ai ẹzi ọfuafo na, a tẹ ruabọhọ usi uwoma ota gbe iruo igbunu na. Ahwo buobu a te kurẹriẹ. Ahwo Sadusi na a jẹ re ikọ na ihri gaga, fikiere a te mu ai fihọ uwou-odi. Rekọ evaọ aso ọyena, Jihova o te vi enjẹle riẹ ze, o te rovie ethẹ uwou-odi na kẹ ikọ na jẹ ta kẹ ae nọ: ‘Wha zihe kpobọ etẹmpol na re wha jọ obei wuhrẹ ahwo.’

Nọ oke o ke, a tẹ vuẹ ogbẹgwae isu egagọ ahwo Ju nọ a re se Sanhẹdrin inọ: ‘Ethẹ uwou-odi na e gbẹ kare, rekọ ahwo nọ wha mu na a gbẹ rrọ etẹe he! A rrọ obọ etẹmpol na bi wuhrẹ ahwo!’ A tẹ wariẹ mu ikọ na, a tẹ rehọ ai ziọ obọ Sanhẹdrin na. Ozerẹ okpehru na ọ tẹ ta nọ: ‘Ma vuẹ owhai nọ wha gbẹ ta ẹme kpahe Jesu hu!’ Rekọ Pita ọ tẹ ta nọ: “Ọghẹnẹ họ osu nọ ma re yoẹme kẹ orọnikọ ahwo ho.”

Eva e tẹ dha isu egagọ na te epanọ a rọ gwọlọ kpe ikọ na no. Rekọ ohwo Farisi jọ nọ a re se Gamaliẹl ọ tẹ kpama jẹ ta nọ: ‘Wha yọroma! O sae jọ nọ Ọghẹnẹ ọ rrọ kugbe ahwo nana. Kọ wha gwọlọ ginẹ họre Ọghẹnẹ?’ A te yoẹme riẹ. A tẹ fa ikọ na eviaviẹ, jẹ vẹvẹ ai unu inọ a siọ usi uwoma ba ẹta, a te siobọno ai. Rekọ oyena o whaha ikọ na ghele he, a gbẹ jẹ ta usi uwoma na ududu evaọ etẹmpol na, je n’uwou ruọ uwou.