Jọ Elo Mai O Lo Kẹse Kẹse

¹ Eme họ elo? Obe-ofeme o fa riẹ wọhọ “oware nọ u re ru ohwo ruẹ ude.” Rekọ evaọ uzẹme, ghelọ ẹnyaharo eriariẹ ona, ohwo-akpọ ọ re riẹ uyo onọ nọ Jihova ọ nọ nọ a kere fihọ Job 38:24 gbagba ha. Kọ ma rẹ sae rria uzuazọ ababọ elo? Ababọ elo ma rẹ sae rria ha. Elo ọ r’oja kẹ ude ruẹ, yọ Ebaibol ọ vuẹ omai nọ evaọ abọ ẹzi, “Ọghẹnẹ họ elo.” (1 Jọn 1:5) Ma fi ẹrorọsuọ mai kpobi họ Ọnọ ọ “kẹ omai elo.”—Ol. 118:27.

² Onana o rọ uzẹme evaọ aruakpọ rekọ o mae rọ erei evaọ edhere ẹzi. Egagọ erue i su ahwo buobu thọ no, a te fi ai họ ebi ẹzi, “be rehọ abọ rara igbẹhẹ wọhọ otuaro.” (Aiz. 59:9, 10) Uyoyou gbe ororokẹ riẹ nọ u wo ibe he, o wọ Jihova nọ o ro ‘vi elo gbe uzẹme ze.’ (Ol. 43:3) Evaọ edhere nọ a rẹ ruẹ ima ahwo buobu nọ i wo ovuhumuo a dede onana rehọ no, a te bi no “ebi e ruọ elo ọnwranwra riẹ.”—1 Pita 2:9.

³ Jesu Kristi o ru ẹkẹ-abọ ologbo evaọ elo ọwha ze akpọ na. Ọ ta nọ: “Mẹ [họ] elo nọ ọ ze akpọ na; kohwo kohwo nọ ọ rọwo omẹ ọ gbẹ jọ ebi hi.” (Jọn 12:46) Oke riẹ kpobi, ẹgba, gbe ekwakwa riẹ ọ kpọ rai kpohọ eruvia elo na. Ọ nya uthethe gbe okẹkẹe otọ ẹwho riẹ duwu, jẹ ta usiuwoma je wuhrẹ evaọ unwenọ ẹwho gbe iwhre kpobi. O thihakọ ukpokpoma no kabọ kabọ ze, rekọ o dikihẹ ga kẹ iruo riẹ re ọ vaha elo uzẹme na.

⁴ Jesu ọ tẹrovi ẹsalọ, ewuhrẹ, gbe ẹruẹrẹhọ ilele riẹ, avọ uzedhe ute nọ o wo họ iroro. Eva Matiu 5:14-16 ma se ithubro riẹ kẹ ae anọ: “Whai họ elo rọkẹ akpọ na. . . . Ru re elo rai o lo iraro ahwo, re a ruẹ iruo iwoma rai, a jiri Ọsẹ rai nọ ọ rọ obọ odhiwu.” Wọhọ Jesu, a rẹ jọ “ikpẹ eva akpọ na,” vaha elo uzẹme na kẹre te oria kpobi. (Fil. 2:15) A rehọ evawere jẹ iruo eyena rehọ, bi riwi ei wọhọ oware ọsosuọ evaọ uzuazọ rai. U kri hi, nọ Pọl ọ rọ ta nọ emamọ usi na ‘a vuẹ riẹ no kẹ enọ a ma kpobi evaọ akpọ na.’ (Kọl. 1:23) Ukoko Ileleikristi na kpobi a kuomagbe evaọ erugba iruo ilogbo eyena.

⁵ Eva e rẹ were omai nẹnẹ inọ ma rọ omọvo ahwo nọ i “siobọno iruo ebi” no. (Rom 13:12, 13) Ma rẹ sae dhesẹ ovuhumuo mai ẹkwoma aro o ro kele oriruo nọ Jesu o fihọ otọ gbe ọrọ Ileleikristi ẹrọwọ oke anwae. Ẹgwọlọ nọ amọfa a re ro yo kpahe uzẹme na o rẹ gaga jẹ kpata enẹna vi oke ọfa kpobi evaọ ikuigbe ohwo-akpọ. A rẹ sae wawo iruo ọfa evaọ ẹkpata kugbe irere nọ iruo usiuwoma ota na o rẹ wha ze he.

⁶ Ẹvẹ Ma Sae Ro Lo Wọhọ Ikpẹ? Edhere ọsosuọ nọ ma re ro ru elo mai lo họ abọ wo evaọ iruo usiuwoma ota Uvie na. Ukoko kpobi u re wo ọruẹrẹfihotọ ekẹse kẹse kẹ usiuwoma ota evaọ ẹkwotọ nọ a kẹ rai. Oghoghẹrẹ ebe buobu e riẹ evaọ evẹrẹ buobu. A bi ru ewuhrẹ ologbo evaọ iwuhrẹ na, yọ enọ e riobe a bi fiobọhọ wuhrẹ amọfa. Uvẹ nọ a re ro w’abọ u rovie kẹ ezae, eyae, enọ e kpako no, makọ emaha dede. A zizie kohwo kohwo evaọ ukoko na re o w’abọ evaọ oghẹrẹ kpobi nọ ẹgba riẹ hayo eyero riẹ o te. Iruẹru ukoko na kpobi e tẹrovi usiuwoma ota, avọ eruẹrẹfihọ nọ i re fiobọhọ kẹ ohwo kpobi re o w’abọ evaọ edhere jọ. Usu ekẹse kẹse kugbe ukoko na họ edhere nọ o mae woma nọ o rẹ k’imuẹro nọ elo mai o gbe bi lo.

⁷ Ma rẹ sae lo evaọ idhere nọ i kpomahọ isẹri-ise ẹmeunu ha. Amọfa a rẹ sae gaviezọ k’omai fiki uruemu mai. Oyena họ oware nọ Pita o wo họ iroro okenọ ọ ta nọ: “Yọrọ uruemu ezi udevie otu Egedhọ, re . . a vẹ ruẹse te ruẹ iruo iwoma rai, a vẹ kẹ Ọghẹnẹ oro.” (1 Pita 2:12) Ahwo buobu a re vuhu iruo hayo ukoko mu ẹkwoma uruemu nọ ahwo nọ a riẹe eva a bi dhesẹ. Okenọ iriughe a te muẹrohọ ahwo nọ uruemu rai o rọ fuafo, oruọzewọ, dhedhẹ, gbe enọ i re koko uzi, a re riwi ahwo yena wọhọ enọ i wo ohẹriẹ a ve broziẹ nọ a be rehọ ute nọ u kpehru vi ahwo dekọ rria. Fikiere ọzae o re ru elo riẹ lo okenọ ọ be kẹ aye riẹ adhẹẹ je rri rie ghaghae evaọ edhere uyoyou; aye na o re ru epọvona ẹkwoma uzou-uwo ọzae riẹ nọ ọ rẹ kẹ adhẹẹ. Emọ a re wo ohẹriẹ okenọ a te bi yoẹme kẹ esẹ gbe ini rai jẹ whaha ọfariẹ-ogbe gbe imu egaga. Ọnọ a rehọ fihọ iruo nọ o re muẹrohọ iruo riẹ, ọnọ o wo oruọzewọ, je wo ororokẹ rọ kẹ amọfa a re rri rie ghaghae. Ẹkwoma edhesẹ iruemu Oleleikristi enana, yọ ma bi ru elo mai lo, bi dhesẹ edhere uzuazọ mai rọ kẹ amọfa.

⁸ Usiuwoma ota yọ ẹmeọta kẹ amọfa kpahe oware nọ ma wuhrẹ no Ẹme Ọghẹnẹ ze. A re ru oyena no platfọmo ze hayo evaọ inuẹthẹ, rekọ orọnikọ eria eyena ọvo a rẹ jọ ru ei hi. Iruo ekẹdẹ kẹdẹ mai e rẹ lẹliẹ omai nyaku ahwo buobu. Bro ẹse evaọ okpẹdẹ whọ rẹ t’ẹme kugbe ọrivẹ nọ ọ be rria kẹle owhẹ? Bro ẹse ohwo jọ o re kporo ẹthẹ ra? Bro oghoghẹrẹ ahwo whọ rẹ nyaku okenọ whọ tẹ be dẹ eware, ruọ imoto, hayo nọ who bi ruiruo evaọ oria iruo ra? Otẹrọnọ whẹ yọ ọmoha evaọ isukulu, kọ whọ sae kele unu ahwo nọ whọ rẹ t’ẹme kugbe evaọ okpẹdẹ? Uvẹ nọ a rẹ rọ t’ẹme kugbe amọfa u wo umuo ho. Oware nọ o gwọlọ nọ who re ru kpobi họ who re wo umutho iroro Ikereakere jọ h’iroro, fi Ebaibol gbe emebe-evẹvẹ jọ kẹloma, jẹ rehọ iroro obọ ra t’ẹme via nọ uvẹ na u te rovie.

⁹ Dede nọ isẹri ise ọnyakuo o re lọlọhọ, eho ọ rẹ ro ahwo jọ oma re a dae riẹ. O rẹ sae jọ ẹbẹbẹ ẹme ọta lahwe, a ve bi sikẹ nọ a rẹ dhomovuọ gaga hayo udu u re bru rai re a nya bru erara. Ozọ o rẹ sai mu ai kpahe oghẹrẹ nọ ahwo a ti riwi ae hayo ẹme ọgaga nọ ohwo na ọ te kpahe. Ahwo nọ a ghinẹ riẹ kpahe iruo isẹri ise ọnyakuo a rẹ sae vuẹ owhẹ nọ awaruọ ọvo ọ riẹ hẹ. Amọfa a wọhọ omai; a wo ẹgwọlọ ọvona, a wo ọdawẹ ọvona, a tẹ jẹ gwọlọ eware evona kẹ omobọ rai gbe iviuwou rai. Ahwo buobu a re dede ohwo nọ ọ rọ wowou avọ oma-ehwẹ hayo nọ o wo ẹzi ogbẹnyusu rehọ. Re whọ sae muhọ, who re ‘wo udu.’ (1 Teṣ. 2:2) Dede, whọ tẹ nwani muhọ no, o rẹ sae gbe owhẹ unu jẹ k’owhẹ evawere kpahe iyẹrẹ nọ u re noi ze.

¹⁰ Ma Re Wo Oghale Okenọ Ma Te Ru Elo Mai Re O Lo: Enana họ iriruo eware omosasọ jọ nọ e via no isẹri ise ọnyakuo ze: Aye nọ ọ kpako te ikpe 55 no ọ jẹ gwọlọ fa iyẹrẹ vrẹ. Nwane epanọ omoto ọ jẹ te rọ tehiẹe kie na, oniọvo ọmọtẹ jọ ọ tẹ jabọ-kru ei o te si ei ruọ akotọ, ọ tẹ ta nọ: “Iviena yọrọ oma. Ma be rria evaọ etoke imuozọ!” O te dhesẹ oware nọ osoriẹ nọ etoke na i je muozọ te erei. Aye na ọ tẹ nọ inọ, “Whẹ yọ omọvo Isẹri Jihova?” Fikinọ o wo obe mai jọ no obọ oniọvo ọmọtẹ riẹ ze no vẹre, aye na ọ gwọlọ nọ ọ rẹ nyabru omọvo Isẹri Jihova jọ, yọ onya nana o tẹ nwani ru ei lọhọ.

¹¹ Oniọvo ọmọtẹ jọ o mu ẹmeọta họ kugbe aye jọ evaọ oria ẹhẹrẹ evaọ ọfisi edọkita. Aye na ọ gaviezọ ziezi ọ tẹ ta nọ: “Eva oke jọ nọ ovrẹ, mẹ nyaku Isẹri Jihova; rekọ otẹrọnọ oke jọ evaọ obaro me ghine zihe ruọ Osẹri Jihova, yọ fiki ẹme nọ whọ ta kẹ omẹ obọnana. Ẹme ra nọ me yo o wọhọ nọ me mu elo nọ o bi lo no ebi ze họ ẹruẹ no.”

¹² Edhesẹ uwowou o rẹ sae jọ owọ ọsosuọ nọ a re ro fiobọhọ kẹ amọfa wuhrẹ uzẹme na. Nọ a je no usiuwoma ota kpozi, inievo emetẹ ivẹ jọ a te muẹrohọ ọkpọkwaye jọ nọ o bi nwotọ no imoto ze yọ o wọhọ nọ oma o ga riẹ hẹ. A te dikihẹ jẹ nọ aye na sọ ọ gwọlọ obọfihọ. U te gbe aye na unu nnọ erara ivẹ a dhesẹ isiuru otiọye na te epanọ o ro sikẹ nọ ọ gwọlọ riẹ oware nọ u ru rai dhesẹ uwowou otiọye na. Onana u te rovie uvẹ kẹ isẹri-ise. Aye na ọ tẹ kẹ ae adrẹse riẹ je zizie ae nọ a weze bru ie. A te mu uwuhrẹ họ. U kri hi aye na o te mu iwhurẹ họ ẹnya, enẹna ọ be ghale uzẹme na kugbe amọfa.

¹³ Oniọvo ọmọtẹ nọ ọ kpako no ọ rehọ uvẹ isẹri-ise irioke ruiruo evaọ unueri. Ọ nyaku idibo-uwou, enọ e rẹ yọrọ emọ, ikere-ebe ebanke, gbe amọfa nọ e rẹ nya akotọ unueri wariẹ evaọ ohiohiẹ. O je ru ebe uwuhrẹ Ebaibol, nọ ọ jẹ keria ekaba nọ e kẹle unueri na. Ahwo buobu a wuhrẹ uzẹme na no obọ riẹ ze yọ enẹna a zihe ruọ Isẹri Jihova no.

¹⁴ Evaọ oria iruo riẹ, oniọvo ọmọtẹ jọ o te yo urru ibe oruiruo nọ ọ jẹ t’ẹme kpahe utu ọ esuo-ohrowo nọ o roro nọ a rẹ sae ku ebẹbẹ akpọ na họ. Oniọvo ọmọtẹ na o te rovie unu, gbiku kpahe eware nọ Uvie Ọghẹnẹ o ti ru. Ẹmeọta-kugbe ọnana evaọ iruo u te su kpohọ obe uwuhrẹ Ebaibol evaọ obọ uwou, uwhremu riẹ aye na avọ ọzae riẹ a te zihe ruọ Isẹri.

¹⁵ Jọ O Thọrọ Owhẹ Ẹro Vievie He Inọ Whẹ Yọ Osẹri! Okenọ Jesu o dhesẹ ilele riẹ wọhọ “elo akpọ na,” iroro riẹ họ re a fiobọhọ kẹ amọfa wo erere no orovie via ẹzi Ẹme Ọghẹnẹ. Otẹrọnọ ma fi ohrẹ Jesu họ iruo, ẹvẹ ma re riwi odibọgba mai?

¹⁶ Okenọ a tẹ be gwọlọ iruo, ahwo jọ a rẹ salọ iruo ubroke. A re fi uwhru họ oke gbe omodawọ nọ a re fihọ iruo keme o were rai nọ a rẹ rehọ abọ buobu oke rai ro le iruo nọ a duku nọ e mai wo osaohwa. Kọ ma bi wo eriwo ọvona kpahe odibọgba mai? Makinọ ma rehe riẹ họ owha-iruo u te je no omai eva ze nọ ma rẹ hẹriẹ oke jọ kẹ odibọgba na, kọ u fo re isiuru ọsosuọ mai o jọ oria ọfa?

¹⁷ Nọ ma vuhumu no nọ oware wọhọ Oleleikristi ubroke o riẹ hẹ na, ma re ru omarọkẹ mai, ‘vro omobọ mai’ jẹ rọwo nọ ma re lele Jesu ‘kẹse kẹse.’ (Mat. 16:24) Isiuru mai họ re ma gbẹ hae nyaharo avọ ‘ẹwẹ kpobi,’ rehọ uvẹ kpobi nọ u rovie ru elo mai lo re ma sae nyate ahwo evaọ oria kpobi nọ a rọ. (Kọl. 3:23, 24) Ma rẹ whaha iruemu akpọ hrọ, yọrọ ajọwha mai wọhọ epaọ ọsosuọ, je wo imuẹro nọ elo mai o gbe bi lo via nwranwranwra. O rẹ sae jọ nọ ejọ a kuvẹ kẹ ajọwha rai re u dhẹmu gbe elo rai re u zihe ruọ ogẹgẹ elo, nọ o rẹ jọ bẹbẹ re a rue riẹ evaọ ugbo thabọ. Ohwo otiọye na ọ gwọlọ obọfihọ re o zihe ze ajọwha odibọgba riẹ.

¹⁸ Ahwo jọ a rẹ gwọlọ si enẹ h’emu fikinọ ovuẹ mai o viodẹ kẹ ahwo buobu hu. Pọl ọ ta nọ ovuẹ na kpahe Kristi ọ rọ “ugheghẹ rọ kẹ enọ i bi vrẹ na.” (1 Kọr. 1:18) Dede, ghelọ eme nọ amọfa a ta, o whowho avọ ẹgba nọ: “Mẹ sae vuọoma usiuwoma na ha.” (Rom 1:16) Ohwo nọ ọ rẹ vuoma o re roro nọ o te ohwo ho. Ẹvẹ oma o jẹ vuọ omai nọ ma be t’ẹme kpahe Osu Oride evaọ ehrugbakpọ na gbe eware igbunu nọ o ru no kẹ evawere ebẹdẹ bẹdẹ mai? Oyena yọ oware nọ o kare iroro re ma roro nọ ma te ohwo ho nọ ma be ta uzẹme kẹ amọfa. Ukpoye, o rẹ gba omai họ re ma ru ẹgba mai kpobi, dhesẹ imuẹro mai inọ ma “kare omaovuọ.”—2 Tim. 2:15.

¹⁹ Elo uzẹme nọ o bi lo enẹna evaọ ekwotọ nọ e wariẹ akpọ na họ e kẹ ẹruore ọruọruọ uzuazọ ebẹdẹ bẹdẹ eva aparadase akpọ kpokpọ. Joma dhesẹ nọ ma fi ohrẹ na họ udu re ma ru elo mai lo kẹse kẹse! Otẹrọnọ ma ru erei, ma ti wo oware nọ o rẹ suẹe ze nọ ma jẹ ghọghọ wọhọ ilele na nọ evaọ “kẹdẹ kẹdẹ a jẹ jọ eva uwou egagọ-ode gbe obọ uwou seri uwuhrẹ Jesu Kristi họ họ.” (Ẹjẹlẹ ibieme na ọmai.)—Iruẹru 5:42.