Ẹdhọ Kpahe Isẹri Jihova A Broziẹ Riẹ No

NỌ A va ẹdhọ na ẹsibuobu no, uwhremuna Okọto nọ a rẹ Kpae Ẹdhọ kpohọ ọrọ obọ Tẹsalọnika, Grisi, a te kokohọ evaọ June 8, 1995, re a yo ẹdhọ kpahe eyae ene Isẹri Jihova. Ẹme ọvẹ a so? Ahwo-ta-kurẹriẹ, onọ uzi Grik o ghọ kri vrẹ ikpe 50 no.

Dede, okenọ okọto na u koko họ no, ọnọ o siobe se ai na—ozerẹ nọ o tu ẹdhọ na kpahe eyae ene na—ọ gbẹ rọ uzuazọ họ. Ozerẹ ọfa ọ tẹ daoma re o dikihẹ oria riẹ, rekọ okọto na ọ rọwo ho. Fikiere, u re gbunu hu inọ iminiti 15 ọvo a guẹdhọ na! Oguẹdhọ na ọ tẹ kiẹ amọfa enọ i siobe se isẹri na, ọ tẹ ruẹ nọ a reabe ohwo-ta-kurẹriẹ nọ o mukpahe uzi hi. Oziẹ-obro ọnana o te dhesẹ nọ u no ekọto Grik eva ze re a rọ adhẹẹ gbe omarokpotọ kẹ oziẹ nọ Okọto Europe ọrọ Ẹkẹ-Uvẹ Ohwo kpobi a bru evaọ 1993.

O mai gbunu dede nọ a ruẹ isẹi eyae esa enọ i kugbe siobe na nọ e nya bru Isẹri na ze, be kẹ ae uyere obufikparọ nọ uno eva ze. Omọvo rai jọ ọ tẹ ta nọ: “Eva e dh’owhai hi rọ kẹ eware enana kpobi nọ e via na.” O te fibae nọ: “Ma so riẹ hẹ. Ozerẹ na ọ gb’omai họ nọ ma siobe s’owhai. Enẹna nọ ọ gbẹ rọ uzuazọ họ na, ma gwọlọ nọ wha ze obọ iwhre gbe iwou mai.”

Enẹ, Jihova ọ wariẹ kẹ ahwo riẹ evaọ obọ Grisi obokparọ igbunu. A kẹ izi kpahe ohwo-ta-kurẹriẹ evaọ Grisi evaọ 1938 gbe 1939. Evaọ 1993 Okọto Europe ọrọ Ẹkẹ-Uvẹ Ohwo o te bru oziẹ nọ re a rọ uzi onana kpokpo Isẹri Jihova o thọ.—Rri Uwou-Eroro Na, September 1, 1993 (ọrọ Oyibo), ewẹre-obe 27-31.