Jọ Elo Ra O Lo!

UKUHỌ RIẸ, oke u te zi te re ọkpọkuọzae na ọ ruẹ Mesaya nọ a ya eyaa riẹ na! Ẹkwoma odhesẹvia Ọghẹnẹ, Simiọn ọ riẹ nọ “ọ rẹ te ruẹ uwhu hu bẹsenọ ọ te ruẹ Kristi Ọnowo na no.” (Luk 2:26) Rekọ ẹvẹ u gbunu te nọ Simiọn ọ ruọ etẹmpol na nọ Meri avọ Josẹf a rọ wọ Jesu fihọ abọ riẹ! Ọ tẹ kẹ Ọghẹnẹ ujiro, ta nọ: “Olori, rure odibo ra ọ jọ enẹna nyawa tou . . . keme ibiaro mẹ e ruẹ esiwo ra . . . elo nọ ọ rẹ te via kẹ ahwo Egedhọ jegbe oruaro rọ kẹ Izrẹl ahwo ra.”—Luk 2:27-32; wawo Aizaya 42:1-6.

Jesu, no oke ame-ọhọ riẹ nọ ọ jọ ikpe 30 rite oke uwhu riẹ, ọ ghinẹ jọ “elo” rọ kẹ akpọ na. Evaọ idhere vẹ? O je lo elo ẹzi via ẹkwoma usiuwoma ota kpahe Uvie Ọghẹnẹ gbe ẹjiroro Riẹ. Ọ tẹ jẹ ba iwuhrẹ egagọ erue fihọ je dhesẹ iruo ebi vevẹ. (Matiu 15:3-9; Ahwo Galesha 5:19-21) Fikiere, Jesu ọ tẹ sae ta gbagba nọ: “mẹ họ elo akpọ na.”—Jọn 8:12.

Ghele, Jesu o whu evaọ ukpe 33 C.E. Kọ elo na ọ jọ oke oyena fu? Vievie, ajo! Nọ ọ gbẹ jọ otọakpọ, Jesu ọ ta kẹ ilele riẹ nọ: “Ru re elo rai o lo iraro ahwo.” (Matiu 5:16) Fikiere, nọ Jesu o whu no ilele riẹ a te gbe je ru elo na lo.

Evaọ aro orokele Jesu, Ileleikristi inẹnẹ a re dhesẹ elo Jihova via ẹkwoma abọ o wo evaọ iruo usiuwoma ota na. A rẹ “nya wọhọ emọ elo,” dhesẹ oma rai wọhọ iriruo elo evaọ ẹria uzuazọ Oleleikristi.—Ahwo Ẹfẹsọs 5:8.