“Wha Wo Odiri Ọwhawha”

‘O GWỌLỌ odiri ọwhawha,’ re “eya riẹ eruẹse te [omai] obọ.” (Ahwo Hibru 10:36) William Barclay owuhrẹ na o ru rie vevẹ nọ ubiẹme Grik rọ kẹ “odiri” nọ Pọl ukọ na ọ rọ jọ etenẹ ruiruo na a sae rehiẹe dhesẹ “ẹgba okakọ nọ o rẹ rọ rria otọ eyero ọgaga nọ u kiehọ iẹe oma ha.”

Evaọ igbehru obọ Europe, obei oghẹrẹ okakọ otiọye na ọ rọ. Fiki igbunu, a se riei rria bẹdẹ bẹdẹ. Dede, okakọ uwowoma onana o rẹ rria bẹdẹ bẹdẹ hẹ, rekọ o rẹ rria ikpe buobu, jẹ mọ idodo iwoma evaọ oke-uvewhru. The New Encyclopædia Britannica o ru rie vevẹ nọ odẹ na rria bẹdẹ bẹdẹ a rehọ e riẹ kẹ okakọ na fiki “ogaga gbe ẹtọ riẹ.” (Odẹ otọokiẹ-eriariẹ ekakọ enana Sempervivum otofa riẹ re họ “rria bẹdẹ bẹdẹ.”)

Oware nọ o lẹliẹ okakọ onana nọ o rẹ rria krẹkri na mai gbunu họ o rẹ rro evaọ otọ nọ o re wou eware he. A rẹ rueriẹ evaọ egọdọ nọ e rọ igbehru, oria nọ ẹroro na ọ jẹ ga te 35°C evaọ euwa 24. Ọ rẹ dhẹ fihọ ehru itho nọ ẹkpẹ kakao o ruru. Eme họ edidi riẹ jọ nọ ọ be rọ zọ evaọ eyero ọgaga itieye na?

Rria bẹdẹ bẹdẹ na o wo ebe egbogbodo, nọ e rẹ sai kru ame. Onana u re ru ei rehọ uvẹ ame igrigri kpobi nọ e rẹ jọ evaọ oke iso hayo ekpalekpa-ame nọ erẹ ghra ruiruo. Ofariẹ, ọ rẹ rro ẹkuẹko nọ i re ku ẹgba kugbe re e dada awọ mu otọ itho na re i kru ei ga. Ẹkwoma awọ riẹ nọ e rẹ nya ruọ udevie itho nọ e bẹre, o wo uketha no oghẹrẹ ẹroro kpobi, o tẹ make rọnọ ẹkpẹ na o bu hu. Ẹme na họ, ọ rẹ jọ dhidhidhi ẹkwoma efihiruo vọvọ eware nọ ọ rẹ sai wo te obọ kpobi.

Evaọ etata ẹzi, ma rẹ sae ruẹ oma mai evaọ eyero nọ i re fi ẹgba odiri mai họ odawọ. Eme o re fiobọhọ k’omai thihakọ evaọ otọ odawọ? Wọhọ okakọ rria bẹdẹ bẹdẹ na, ma rẹ sai koko ame uzuazọ Ẹme Ọghẹnẹ họ jẹ nya usu okpekpe kugbe Ileleikristi uzẹme rọ kẹ obufihọ gbe uketha. Maero, wọhọ okakọ uwowoma onana, ma rẹ talamu “utho” mai, Jihova, jẹ talamu Ẹme riẹ gbe ukoko riẹ.—2 Samuẹl 22:3.

Eva uzẹme, okakọ rria bẹdẹ bẹdẹ na o rọ ekareghẹhọ owoma inọ, makọ evaọ eyero oyoma, ma rẹ sai thihakọ otẹrọnọ ma rehọ uvẹ eruẹrẹfihotọ nọ e riẹ ruiruo. Jihova ọ k’omai imuẹro nọ odiri otiọye na o re su kpohọ ‘ukuoriọ eyaa na,’ onọ otofa riẹ o rọ ẹria ebẹdẹ bẹdẹ.—Ahwo Hibru 6:12; Matiu 25:46.