Iwhowho Uvie A Be Niyẹrẹ

Ogaga Enwene Ẹme Ọghẹnẹ

EPANỌ ọye ọvo ọ rọ unu riẹ fa via, ọ jọ ohwo nọ o je “zu eme họ, kpokpo, jẹ ta ẹmeẹsọ.” (1 Timoti 1:13) Rekọ o nwene! Enwene Pọl ukọ na o rro te epanọ ọ sai ro whowho uwhremu na nọ: “Wha rọ aro kele omẹ, wọhọ epanọ mẹ rọ aro kele Kristi.”—1 Ahwo Kọrint 11:1.

Nẹnẹ, egba-idu egegagọ oruọzewọ evaọ akpọ na kpobi a bi ru oghẹrẹ enwene otiọye na. Eme o be lẹliẹ ai ru ere? A be rehọ eriariẹ Ẹme Ọghẹnẹ je bi fi ei họ iruo evaọ izuazọ rai. Oriruo ọnana o dhesẹ ogaga enwene Ẹme Ọghẹnẹ.

Eva obọ Slovenia ọzae avọ aye jọ nọ e who no ae ọvo a be rria oka iwhre jọ. Ọzae na, Jože, ọ kpako te ikpe 60 no rekọ o wo ẹbẹbẹ idieda. Ghele, ọ be sẹro aye riẹ nọ ọ be mọ, Ljudmila. Ẹdẹjọ iwhowho Uvie ivẹ a tẹ nya bru Jože. O te zizie Isẹri na ruọ uwou riẹ, oria nọ a jẹ ruẹ aye riẹ. Nọ a yo ovuẹ Uvie na no, irui oghọghọ i te su no ova Ljudmila ze. Oware nọ Jože omariẹ o yo o were riẹ oma ọ tẹ jẹ nọ enọ buobu. Nọ a fi ebe Ebaibol jọ họ ada kẹ ọzae avọ aye na no, Isẹri na a tẹ nya vrẹ.

Amara ọvo nọ u lele i rie, Isẹri na a te zihe, a tẹ ruẹ obe ọ Whọ Sae Ria Bẹdẹ Bẹdẹ eva Aparadase ọ Otọakpọ evaọ ehru emẹjẹ. Nọ a nọe oria nọ o je wo obe na, Jože ọ tẹ ta nọ: “Mẹ ruẹ oworovia na evaọ uke emagazini jọ nọ whọ nya seba k’omẹ. Fikiere me te kere kpohọ ọfisi rai nọ ọ rọ obọ Zagreb yare kẹ obe na.” Fiki isiuru riẹ, a te ziziei re ọ nyaze ehaa Ekareghẹhọ uwhu Kristi nọ o be tha nọ a ti ru evaọ Ọgwa Uvie na. Eva e were Isẹri na, nọ a rueriẹ nọ ọ nyaze.

U kri hi a te mu uwuhrẹ Ebaibol họ, avọ emamọ ẹnyaharo. Wọhọ oriruo, nọ a jọ Ebaibol na dhesẹ kẹ Jože inọ “whọ kare ẹdhọ ọvuọvo kẹ oma ra ha, hayo . . . ruwẹ kẹ ae he,” o te koko emema egagọ nọ e jọ uwou riẹ họ, kugbe iwoho egagọ, o te ku ai fiẹ.—Ọnyano 20:4, 5.

Uruame uzẹme ẹzi nọ u je kpe Jože a te mu ei họ e furie. Rekọ, o gbe wo uruame ọfa jọ ghele. Oware wọhọ ikpe 18, ọ jẹ hẹ da ilita enwane ikpe kẹdẹ kẹdẹ. Fiki ẹbẹbẹ edada riẹ, ọ jẹ rẹro te ugboma riẹ hẹ. Rekọ nọ o wuhrẹ eriwo Ọghẹnẹ no kpahe ogbẹda idi nọ i re muẹ, o tẹ jọ ọtamuo riẹ nọ o re nwene.

Ọ daoma re o fi ẹbẹbẹ idieda riẹ na kparobọ ẹmẹrera, je kele unu nọ ọ be da bu te kẹdẹ kẹdẹ. U kri hi o te siobọ no udi. Evaọ etoke iwuhrẹ Ebaibol riẹ, o te je wuhrẹ nọ a gwọlọ mi Ileleikristi uzẹme re a ru oma rai fo. Fikiere, ọ tẹ rọ ugho kẹ Isẹri na jẹ ta nọ: “Wha nya, re wha rehọ ugho onana dẹ oghẹrẹ ẹgọ nọ wha riẹ nọ o fo evaọ iwuhrẹ Ileleikristi gbe eva usiuwoma ota!” Isẹri na a te zihe ze avọ ewu-otọoma, esọso, eviẹ, iwu, ikotu, ota, gbe ẹkpa usiuwoma.

Nọ o wuhrẹ Ebaibol na te ẹgbukpe no, Jože avọ Ljudmila a te te ahwo nọ a re lele Isẹri na kpohọ usiuwoma nuwou ruọ uwou. Emera esa nọ i lele i rie a tẹ rọ ame-ọhọ dhesẹ omarọkẹ Ọghẹnẹ rai via evaọ okokohọ ubrotọ Isẹri Jihova. Makọ owho gbe ẹyao, Jože o bi w’abọ evaọ ẹta usiuwoma na ẹsikpobi, yọ uwhremu na, taure o te ti whu evaọ May 1995, ọ jọ uvi odibo oriruo evaọ ukoko na. Ibi iwoma nọ e jọ uzuazọ ọzae omarokpotọ ọnana avọ aye riẹ dhesẹ oma via na e kẹ imuẹro kpahe ogaga enwene Ẹme Ọghẹnẹ!