“Ewezẹ Mẹ rọ Manikọ Aruakpọ?”
Iyẹrẹ nọ ọ rọ obotọ na o no Malawi ze kpahe Okokohọ Ubrotọ “Enọ I bi Jiri avọ Oghọghọ” ọrọ Isẹri Jihova nọ ọ viodẹ nọ a jọ obei ru evaọ oke-uvewhru ọ 1995.
“EVAỌ akotọ edhere imoto, enwene udevie ofẹ ukiediwo-ọre unueri ọ Awae Malawi, a fi esaebọdo ọsosuọ kpobi họ etẹe anwọ ikpe 29 nọ e vrẹ. U se nọ, ‘Okokohọ Ubrotọ Isẹri Jihova.’
“A dhẹ omoto ologbo jọ fihọ akotọ esaebọdo na, yọ ahwo nọ i bu vi 200 nọ i no ẹwho Mzuzu ze i bi no eva omoto na ze. A wha iwu, eblankẹte, epọto, igogolo, emuore, irre, gbe Ebaibol re a kuomagbe inievo 3,000 rai nọ i no eria efa ze.
“Nọ ma je yere inievo nọ a bi no omoto na ruotọ, George Chikako, nọ ọ kpako te ikpe 63, ọ tẹ nyaze, avọ ebasikoro riẹ nọ o bi ghelie nya uwẹkpẹ na ze, ọ dhẹ edẹ ivẹ no, no Nkhotakota ze. Eva ikpe buobu nọ e vrẹ, a fi Brọda Chikako họ uwou-odi asiane no fikinọ ọ se nọ o re zue izi Ebaibol ho. Omoni riẹ o whu fiki ukpe nọ a kpe rie okenọ ọ jọ uwou-odi. Brọda Chikako ọ tẹ nọ inọ: ‘Ewezẹ mẹ rọ manikọ aruakpọ? A bi ru okokohọ ọnana evaọ uvo koko, yọ ahwo nana a be so ile Uvie do via! Eva ikpe buobu nọ e vrẹ, aso ma jẹ hae kuomagbe, ma vẹ rọ unu kpotọ so ile Uvie, yọ ma tẹ gwọlọ tehe abọ ma vẹ thahe evabọ mai. Enẹna ma bi kuomagbe evaọ ẹgbede, yọ u gbe ahwo na unu okenọ a ruẹ nọ ma rọ buobu nọ a bi roro nọ ma rọ kakao gheghe!’
“A rehọ ẹbe diogba wariẹ oria okokohọ na họ avọ ikpoko nọ a rọ hwa ehru riẹ re o kẹ ae edhedhẹ. A rọ ẹbe bọ iwou-iwhre gbe iwou nọ i kpe fihọ re ahwo nọ e ziọ okokohọ na a wohọ. Ofou aso na ọ vọ avọ edo awere ile nọ i gbe brudhe fiki ozodhẹ ukpokpoma ha.
“Kọ ẹvẹ u fo te nọ okokohọ na o ro wo uzoẹme ọ ‘Enọ I bi Jiri avọ Oghọghọ’!”
[Picture Credit Line on page 32]
Mountain High Maps® Copyright © 1995 Digital Wisdom, Inc.