Emagazini nọ O re Duobọ Te Udu Na

EMAGAZINI nọ i wo unu hu a be jọ akpọ na kporo re e nyate ẹgwọlọ ohọo ise-ebe rọ kẹ evuẹ hayo oma-sasa.

Eme u ru emagazini nọ ọ r’owhẹ obọ na wo ohẹriẹ tere? Ileta nọ ọ rọ obotọ na, nọ u te uwou ogha Watch Tower Society eva Germany obọ, o rẹ sae k’owhẹ uyo na:

“Wha k’obiruo, inievo iyoyou, rọ kẹ omodawọ gbe iruo rai. Okenọ mẹ avọ emezae ivẹ mẹ ma no ewuhrẹ ze, dede nọ oke u te ughọjọ 9:30 no evaọ aso, u te fo re mẹ gaviezọ kẹ Uwou-Eroro ọkpokpọ na [onọ a ru fihọ ekasẹte]. Nọ mẹ be wozẹ imidhe na, me te muọ uzoẹme ewuhrẹ ọsosuọ họ ẹgaviezọ kẹ (April 1, 1995, ọrọ oyibo). Me te roro nọ u fo re mẹ wariẹ gaviezọ kẹe, mẹ tẹ siọ iruo mẹ ba evaọ ikichini re me se uzoẹme na [“Whọ rọ Ghaghae Evaọ Aro Ọghẹnẹ!”] evaọ Uwou-Eroro Na bi riwi lele itepu na. U duobọ t’omẹ udu, maero kọ edhe-eme avọ ene gbe isoi na. Irui i te mu aro mẹ họ esu no ze—rekọ u kri hi. Me yere Jihova inọ mẹ rọ uzuazọ jegbe nọ mẹ rọ kugbe ahwo riẹ gbe nọ mẹ, avọ amọfa buobu, a be sai ru odẹ riẹ via. Ẹjiroro ọvo ọ riẹ hẹ re ma roro nọ ma fioka ha. Ẹzi Jihova ọ rọ kugbe ahwo riẹ. J’omai kpobi ma thihakọ je dikihẹ ga evaọ ẹrọwọ na, evaọ okugbe ọvo. Avọ uyoyou Oleleikristi, oniọvo-ọmọtẹ rai evaọ ẹrọwọ na.”

Orọnikọ ovuẹ ọvo Uwou-Eroro Na o rẹ kẹ hẹ. O re duobọ te idu enọ i bi sei je ru ẹgwọlọ isiuru emuore ẹzi gbe uduotahawọ ẹruoke rai gba. Ẹhẹ, Uwou-Eroro Na o rẹ kẹ ‘emuore evaọ ẹruoke.’—Matiu 24:45.