Amono A te Jọ Etausiuwoma?

EVA ẹgwae nọ Ogbẹgwae Ichọche Akpọ na a gba ole ikpe 40 nọ i kpemu, a tudu họ ahwo na awọ re a “du lahwe evaọ ẹzi usiuwoma-ota” re a je wuhrẹ uthuru rai re a “nya kpohọ usiuwoma-ota.” Ikpe isoi nọ i lele i rie, John A. O’Brien, osu-egagọ Kathọlik, o te kere kpahe ẹgwọlọ nọ a rẹ rọ rehọ ilele ekpokpọ ze “ẹkwoma ẹnya kpohọ iwou rai” orọnikọ “iwou mai ọvo nọ ma rẹ keria ha.” Yọ evaọ January 1994, Pope John Paul II ọ tẹ ta nọ “oke nana o gbẹ rọ oke nọ Usiuwoma na o rẹ rọ vo omai oma ha, o rọ oke nọ a rẹ rọ jọ ehru iwou tae.”

Vevẹ ohwo ọvo ọ be kuyo kẹ use omotiẹse nana rọ kẹ etausiuwoma ha. Ukere jọ evaọ obeusi Australia Illawarra Mercury o ta nọ: “Ahwo Kathọlik nọ e viodẹ evaọ South Coast a wo ajọwha nọ a re ro lele oghẹrẹ nọ Isẹri Jihova a be rọ ta usiuwoma ha.” Ọzae jọ ọ ta nọ usiuwoma ota o rọ “oma ahwo Kathọlik vievie he.” Ọfa jọ ọ kuyo nọ: “U re woma re Ichọche na ọvo o ru ẹnyaharo kẹ omobọ riẹ, rekọ o rẹ jọ ẹkwoma ethẹ-kporo ho. Ẹsejọ o rẹ mai woma ẹkwoma isukulu hayo ileta kere.” Makọ ukọ-Ọghẹnẹ jọ evaọ ichọche jọ o wo otoriẹ ẹme ipopu na ha. Ọ ta nọ: “Ma te tudu họ ahwo awọ re a rria lele Usiuwoma nọ a riẹ na evaọ izuazọ obọ rai. Rekọ o tẹ rọ ẹkwoma ethẹ-kporo, yọ ẹme nọ mẹ gwọlọ kpahe fihọ họ.” Uzoẹme ukere usi na o tẹ gba ẹme na ekru enẹ: “Ahwo Kathọlik a ti yo ẹme Ipopu na re a ta usiuwoma ha.”

Makọ ekie Kristẹndọm evaọ usiuwoma ota, Isẹri Jihova nọ i bu vi ima isoi a bi ru lele ujaje Jesu re a ‘nya i ru ilele ahwo erẹwho kpobi.’ (Matiu 28:19, 20; wawo Iruẹru 5:42.) Usiuwoma ota n’ẹthẹ ruẹthẹ rai a be whae haro evaọ ekuotọ nọ i bu vi 230. Ovuẹ ẹruore a be wha ze, nọ o be fodẹ eyaa igbunu Ebaibol na kẹ obaro. Kọ fikieme whọ gbẹ t’ẹme kugbe ai hi okiọfa nọ a tẹ nyaze?