Obokparọ Ọfa kẹ Isẹri Jihova Evaọ Grisi

EVAỌ October 6, 1995, Ekọto Ẹdhoguo nọ imasa a ru via evaọ Athẹns a tẹ keria kẹ ẹdhọ ọrọ imava egbodibo oke-kpobi Isẹri Jihova jọ. Uzi nọ a thọ họ ọrọ ahwo-ta-kurẹriẹ, yọ oletu iporisi jọ ọye o tu rai kpohọ ekọto na nọ Isẹri na a weze kpohọ uwou riẹ kẹ usiuwoma ota no.

Onọ nọ oguẹdhọ na ọ nọ u dhesẹ nọ o wo isiuru gaga kpahe iruo Isẹri Jihova. Wọhọ oriruo, ọ nọ inọ: “Ẹvẹ wha ru iruo nana kri te no? Didi uruemu ahwo a bi he dhesẹ kẹ owhai evaọ ikpe na kpobi? Didi uyo ahwo a be hẹ kẹ rọ kẹ iruo rai na? Eme wha be ta kẹ ahwo evaọ inuẹthẹ rai?” Ahwo nọ a jọ evaọ ekọto na kpobi a tẹ rọ ezọ viuge kẹ obọdẹ isẹri nọ a jẹ kẹ.

Avọ igbunu rọkẹ Isẹri na, ilọya nọ egọmeti o vi ze na ọye ọ thọ rai. Evaọ eme ekuhọ riẹ, ọ tẹ ta nọ: “Isẹri Jihova a wo udu orọnikọ onọ a rẹ rọ rọwo Ọghẹnẹ rai re a jẹ gọe ọvo ho, rekọ re a je whowho ẹrọwọ rai no ẹthẹ ruọ ẹthẹ, evaọ ẹgbede, gbe evaọ iyẹrẹ, re a tubẹ ghale ebe rai dede ọvọvẹ u te je ai.” Ohwo ẹro egọmeti na ọ tẹ fodẹ oziẹ obusino buobu nọ Ogbẹguae Orẹwho na o bru no. Ọ tẹ jẹ ta kpahe ẹdhọ nọ Kokkinakis o lele Grisi gu, onọ Okọto Ẹkẹ-Uvẹ Ohwo obọ Europe a jo bru kẹ Isẹri Jihova.a Ohwo ẹro egọmeti na ọ tẹ vẹvẹ unu nọ: “Iviena muẹrohọ inọ Grisi ọ tubẹ hwa eho jọ dede evaọ ẹdhọ ọyena. Fikiere ma rẹ yọrọ oma gaga nọ a te se omai ziọ oghẹrẹ edhọ itieye na. Evaọ uzẹme, u tube fo dede re a rehọ edhọ itieye na ziọ ekọto ho.”

Nọ ohwo ẹro egọmeti na ọ ta no, ẹme ọvo o gbe du jariẹ nọ ilọya Isẹri na ọ rẹ ta ha. Ghele, ọ rehọ uvẹ na ta nọ uzi ahwo-ta-kurẹriẹ na o rọ obe he jegbe nọ u bi kpomovuọ họ Grisi oma evaọ akpọ na soso.

Obruoziẹ ologbo na ọ tẹ jẹlẹ ẹro rri ibruoziẹ ivẹ edekọ na, a te bru kẹ oniọvo ọmọzae gbe ọmọtẹ na. Ẹdhọ na, nọ u kri te auwa gbe iminiti ikpe, o jọ obokparọ kẹ odẹ Jihova gbe ahwo riẹ.

Ọnana họ ẹdhọ avene nọ a bi bru kẹ isẹri na anwọ ẹdhọ ahwo-ta-kurẹriẹ ọrọ Kokkinakis nọ Okọto Ẹkẹ-Uvẹ Ohwo obọ Europe a bru. Isẹri Jihova evaọ obọ Grisi a be ghọghọ inọ ebẹbẹ kpahe usiuwoma ota rai i bi furie no jegbe nọ o lọhọ no re a ruiruo na ababọ awhaha.

[Footnotes]