Ono O Bi Su?

“ONO o bi su akpọ na?” Otẹrọnọ ohwo jọ ọ nọ owhẹ onọ oyena, didi uyo whọ rẹ kẹ? Ahwo egagọ buobu a rẹ sae ta nọ “Ọghẹnẹ” hayo “Jesu.” Uzoẹme jọ nọ o roma via evaọ The Freeport News, obe-usi Bahamas, o kẹ uyo nọ umutho ahwo a re rẹro riẹ.

Ọnọ o kere uzoẹme na o te muhọ nọ: “Mẹ ruẹ obe-ovẹvẹ jọ evaọ unuẹthẹ mẹ. Vẹre me re se eme itieye na ha, rekọ enẹna mẹ ta k’omamẹ nọ me re sei. Uzoẹme riẹ o nọ onọ onana, ‘Ono O Bi Ghine Su Akpọ Na?’ ” Ẹkwoma ese obe-ovẹvẹ na nọ a si no Ebaibol ze, aye na o te wuhrẹ nọ osu akpọ na orọnikọ Ọghẹnẹ hayo Jesu hu rekọ Setan Ẹdhọ na.—Jọn 12:31; 14:30; 16:11; 1 Jọn 5:19.

Obe-ovẹvẹ na o ta nọ: “Roro kpahe uruemu ababọ ororokẹ evaega iyoma nọ edafia. Ahwo a rehọ uwou erri errae, iwou-odi, ujojerrae, egbọudu ọ napalm rọ lahiẹ ahwo no, gbe idhere iyoma efa nọ a be rọ lahiẹ je bi kpe ohwohwo ababọ ohrọoriọ. . . . Egaga vẹ e be wọ ahwo kpohọ iruo igbogbo itieye na hayo nọ e be rẹriẹ ai kpohọ eyero nọ a jẹ gwọlọ ru emuemu oyoma otiọye? Kọ who tube roro no ẹdẹjọ sọ ogaga omuomu jọ, nọ a rẹ ruẹ hẹ ọ be kpọ ahwo re a ru iruemu ozighi itieye na?” Kọ u gbunu inọ Ebaibol na o se Setan “ọghẹnẹ akpọ nana”?—2 Ahwo Kọrint 4:4.

Avọ evawere, oke na o kẹlino nọ Setan avọ idhivẹri riẹ a te rọ vrẹ. “Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:17) Ẹhẹ, Ebaibol na ọ yaa nọ ahwo nọ i bi ru oreva Ọghẹnẹ a wo ẹruore ẹria bẹdẹ bẹdẹ evaọ akpọ okiẹrẹe ọkpokpọ. (Olezi 37:9-11; 2 Pita 3:13; Eviavia 21:3, 4) Ẹvẹ omofọwẹ riẹ o te rro te re a si okpomahọ Setan avọ idhivẹri riẹ no!

Nọ o ru eme nọ e rọ obe-ovẹvẹ osese onana kpẹre no, ọnọ o kere uzoẹme nọ o rọ The Freeport News na o te kuhọ nọ: “Eva e ghinẹ were omẹ nọ me se obe-ovẹvẹ oyena . . . keme mẹ be ruawa anwẹdẹ re kpahe eyero akpọ na, gbe ohwo nọ ọ riẹ esuo.”