Ẹdadamu kẹ Ota nọ A jọ France Bọwo

A GBA eku ologbo jọ họ uzou Isẹri Jihova evaọ obọ France kẹle. Fiki iruẹru ogboni nọ ahwo egagọ a dhoma họ evaọ Europe gbe Japan, iredio gbe etẹlivisiọne a te gu erue kpahe Isẹri na. A dhesẹ i rai wọhọ ahwo ogboni nọ e mai bu jẹ mai yoma kpobi.

Evaọ omodawọ re a kpọ eware vi, Isẹri Jihova a te kporo ebe evẹvẹ nọ e k’iyo enọ wọhọ enana: Amono họ Isẹri Jihova? Ileleikristi a rọ? A rẹ lọ ibimu? Fikieme a jẹ nya no ẹthẹ ruọ ẹthẹ? Ẹvẹ a bi ro wo igho kẹ iruo rai? Didi erere Isẹri Jihova a wo kẹ okegbe na?

Obe-ovẹvẹ onana nọ o vọ avọ ovuẹ na a kporo i rie evaọ ẹvẹrẹ French nọ uzoẹme riẹ o rọ Isẹri Jihova—Oware nọ U Fo Nọ Whọ rẹ Riẹ. Re a nya siọ obe-ovẹvẹ na ba kẹ ahwo buobu, a tẹ ruẹrẹ oma kpahe kẹ ẹvravra obe na. No May 13 rite June 9, 1996, bu vi unu ima izii a ghale.

Obe-ovẹvẹ onana u duobọ te ahwo buobu udu, kugbe ahwo egọmeti. Nọ okpohwo jọ o se obe na no, o te kere nọ: “Ota nọ a bọwo Isẹri Jihova na o dh’omẹ eva gaga. Ẹsibuobu me wo ovuhumuo kẹ iruo ezi rai nọ o kare oriobọ no.” Evaọ uyo kẹ obe-ovẹvẹ na, Ohwo-Agbara Europe jọ o te kere nọ: “Ahwo kpobi a riẹ ohẹriẹ nọ o rọ udevie Ileleikristi onọ wha rọ na ziezi gbe ahwo ogboni.”

Evaọ Brittany Osẹri jọ ọ tẹ rehọ obe na kẹ ozerẹ jọ, ọnọ ọ rehọ e riẹ ababọ okioraha. Ozerẹ na ọ ta nọ: “Me yere owhai kẹ oware nọ wha bi ru.” O te fibae nọ: “Mẹ tudu họ ahwo mẹ awọ no re a k’owhai uvẹ ruọ iwou rai re a jẹ j’ame k’owhai da. Wha sae tubẹ ta kẹ enọ wha ruẹ inọ wha te uwou mẹ no. Mẹ gwọlọ jẹ ta k’owhai nọ ebe rai e be were omẹ gaga.”

Nọ obe-ovẹvẹ na u tei obọ no, ọzae Protẹstant jọ evaọ Alsace o te kere se Watch Tower Society be yare uwuhrẹ Ebaibol. O kere nọ: “Nọ me gbe fievahọ ichọche mẹ hẹ na, me bi rẹro emuhọ ẹzi ọkpokpọ.” Makọ ota nọ a rẹ bọwo ai ẹsejọ, Isẹri Jihova evaọ obọ France—uzẹme, evaọ abọ akpọ na kpobi—a gbe bi fiobọhọ k’ahwo re a nyaze te riẹ eriariẹ egbagba ẹjiroro Ọghẹnẹ, onọ o rọ Ebaibol na.—2 Timoti 3:16, 17.