‘Ọghẹnẹ họ Adhẹzọ Mẹ’

EVAỌ ‘oke obẹbẹ’ onana, edawọ gbe ọnyawọ i bi vihọ. Wọhọ oriruo, a rẹ sai fi uruemu oruọzewọ mai họ otọ ẹdawọ evaọ oria iruo. A rẹ sae dawo ẹfuọ mai evaọ udevie ibe isukulu. Yọ akpọ na nọ o gbeku no na ọ rẹ sae dawo ẹgbakiete mai re.—2 Timoti 3:1-5.

Asaf okere Ebaibol na ọ jẹ rria okenọ emuemu o jọ buobu. Ahwo jọ nọ e jẹ rria oke riẹ a jẹ rehọ uruemu othọthọ rai seha. Asaf o kere nọ: “Fiki onana omovia o rọ whaliẹ ae ohọe, umuomu u te ku ewu họ ae oma. A be raha edekọ, a be rehọ okienyẹ guegue ahwo.” (Olezi 73:6, 8) Kọ uruemu utiona u tho onọ whọ riẹ?

Rọ kẹ enọ e gwọlọ ru oware nọ u kiehọ, oghẹrẹ uruemu utioye na o rẹ kẹ ai idhọvẹ, tubẹ wha oyẹlẹ họ ae oma dede. Asaf o weri nọ: “Keme na kẹdẹ kẹdẹ [o jẹ da omẹ]. Oga vi omẹ abọ.” (Olezi 73:14, 16) Ẹsejọhọ enẹ o rọ owhẹ oma re, rekọ kru udu ga! Asaf ọ sai thihakọ emuemu edẹ riẹ, yọ whọ sai thihakọ re. Rekọ evaọ oghẹrẹvẹ?

Asaf o vuhumu nọ ẹdhoguo-okiẹrẹe o lọhọ họ evaọ otọ esuo ohwo-akpọ ọnana nọ ọ gba ha na. (Olezi 146:3, 4; Itẹ 17:23) Fikiere, ukpenọ ọ raha oke riẹ, ẹgba, gbe eyero riẹ rọ daoma si emuemu nọ o wariẹ e riẹ họ no, o fi ẹro họ usu riẹ kugbe Ọghẹnẹ. Asaf o whowho nọ: “Rekọ uwoma kẹ omẹ re me sikẹle Ọghẹnẹ; me ru Ọnowo ỌGHẸNẸ mẹ họ adhẹzọ mẹ.”—Olezi 73:28.

Nẹnẹ, ahwo nọ e be jọ iruo fi iwhayo a rẹ sai fe. Ibuobu a rẹ sai tubẹ rehọ uzou nọ a bi veghe kẹ izi ikiẹrẹe Ọghẹnẹ seha dede. Rekọ u ti woma kẹ ai bẹdẹ bẹdẹ hẹ. Asaf o muẹrohọ nọ: “Uzẹme who fi rai họ eria nọ e be whra; who mu rai fihọ otọ jẹ raha ae [no].”—Olezi 73:18.

Ẹhẹ, evaọ oke nọ Ọghẹnẹ o ve fihọ, iwhayo, ozighi, gbe egbogbo, jegbe iruemu egedhọ efa nọ Ileleikristi uzẹme a re thihakọ rai na, a re ti si ai no. Ebaibol na ọ yeyaa nọ: “A ti kpe iru-umuomu na kufiẹ; rekọ enọ e be hẹrẹ ỌNOWO kpobi, a rẹ te rehọ otọ na reuku.” (Olezi 37:9) Evaọ abọdekọ riẹ, joma do eme ọnọ ọ so ilezi na nọ o ta nọ: “ỌNOWO họ eri mẹ, oria esino ogaga mẹ, Osiwi mẹ, Ọghẹnẹ mẹ, ẹzẹ ogaga mẹ, ọye me re fi eva họ.”—Olezi 18:2.