Efihiruo Ọgbagba Ufuoma Oleleikristi

IKERE-EBE Ileleikristi nọ a kẹ ẹzi na, evaọ ovuhumuo kẹ ẹjiroro Ọghẹnẹ nọ o ro ru ẹwo riẹ kẹre ẹkwoma Kristi (“Keme whai, imoni a se owhai ze emuyẹ”), a jẹ hẹ hrẹ Ileleikristi ẹsikpobi re a yọrọ ufuoma rai orọnikọ re a rehọ ufuoma na wọhọ uvẹ ọ omadhehọ iruo iwo ho (Ahwo Galesha 5:13) hayo wọhọ uvẹ ọ eyoma oruo ho. (1 Pita 2:16) Jemis ọ t’ẹme kpahe ‘eriwi uzi ogbagba ọrọ ufuoma na’ ọ tẹ jẹ riobọhọ nọ ohwo nọ o yo ẹme na nọ o thọrọ ẹro ho, rekọ ọ jẹ ruabọhọ iẹe wọhọ oru ẹme na, ọ rẹ te were eva.—Jemis 1:25.

Pọl ukọ na ọ reawere ufuoma nọ o wo ẹkwoma Kristi rekọ o siomano ufuoma riẹ nọ o re ro ru omobọ riẹ eva were hayo ro ru amọfa eva dha. Evaọ ileta riẹ se ukoko obọ Kọrint, o dhesẹ nọ ọ rẹ raha iroro omọfa ha makọ evaọ eruo oware nọ Ikereakere na e ghọ họ rekọ onọ omọfa nọ o wo eriariẹ tere he ọ te rọ n’enọ, ọnọ iroro riẹ e te kuye fiki oware nọ Pọl o ru. Ọ fodẹ oriruo jọ wọhọ ẹriọ arao nọ a ro dhidhe evaọ aro ẹmẹdhọ taure a tẹ te rehọ iẹe ziọ eki te zẹ. Re ọ re arao otiọye na o rẹ sae lẹliẹ ohwo nọ iroro riẹ e dọmu te he whọku ufuoma nọ Pọl o wo ọ vẹ rọ erei gu Pọl ẹdhọ, oware nọ u fo ho. Fikiere, Pọl ọ tẹ ta nọ: “Fikieme mẹ jẹ rehọ iroro omọfa yerẹ akpọ obọ mẹ? Otẹrọnọ mẹ rehọ evawere rọ re emu, fikieme me je wo afuẹwẹ eva o nọ mẹ re ino avọ uyere okẹ?” Ghele na, o jọ ọtamuo ukọ na inọ ọ rẹ rehọ ufuoma riẹ ruiruo evaọ edhere ọbọga, orọnikọ edhere enwoma ha.—1 Ahwo Kọrint 10:23-33.