Iwhowho Uvie A Niyẹrẹ

Izoge A Jiri Ọghẹnẹ Evaọ Democratic Republic of Congo

IKPE-UDHUSOI buobu nọ e vrẹ no, ọnọ ọ so ilezi na ọ rehọ oma osasa zizie izoge re a kuomagbe evaọ ajiri Ovie ebẹdẹ bẹdẹ na: “Whai emoha na gbe ighele emetẹ na te ekpako na te emaha na! . . . jiri odẹ ỌNOWO na, keme odẹ riẹ ovo họ onọ o mae ro.” (Olezi 148:12, 13) Oware onana nọ o jọ obọ Democratic Republic of Congo via na u dhesẹ ọghọ ologbo onana.

• Uruemu Isẹri Jihova u si ohwo jọ nọ o wo uwou nọ ọkobaro obọdẹ jọ ọ be rria urru. Fikiere ọ tẹ kẹ Isẹri na uvẹ re a wuhrẹ Ebaibol kugbe ọmọtẹ ikpe isoi riẹ, Fifi. Nọ o muẹrohọ ẹnyaharo Fifi no evaọ ewuhrẹ Obe Ikuigbe Ebaibol Mẹ,a ọsẹ riẹ ọ tẹ kẹe uvẹ re o kpohọ iwuhrẹ evaọ obọ Ọgwa Uvie na. Fifi ọsese na ọ tẹ jọ obei wuhrẹ ile Uvie no obe-ile Isẹri na ze. Ole avọ 4 o mae were iẹe, onọ uzoẹme riẹ o rọ “Eyaa Ọghẹnẹ ọrọ Aparadase.”

Ẹdẹjọ ọsẹ Fifi ọ tẹ jiroro nọ ọ rẹ rehọ iẹe kpohọ ichọche riẹ. Rọ kẹ igbunu ohwo kpobi, Fifi ọ se nọ ọ rẹ so ile ichọche na. Fikieme? Keme o roro nọ ile nọ a be jọ ichọche ọsẹ riẹ so na e rọwo kugbe eware nọ ọ be jọ uwuhrẹ Ebaibol riẹ wuhrẹ hẹ. Avọ aruọwha, kọ ile Uvie isiuru riẹ na ọ dhugbẹ so.

Nọ a daoma bẹ no re a nwene iroro riẹ, isu ichọche na a tẹ jiroro nọ a re si Fifi nọ ọ rọ ikpe isoi no ichọche no! Makọ olahiẹ onana, ọsẹ riẹ ọ fọ rirẹ. O were riẹ nọ Fifi o dikihẹ ga kẹ oware nọ ọ rọwo. T’ọsẹ t’oni Fifi a gwọlọ e riẹ nọ ọ gbẹ nyusu kugbe Isẹri Jihova.

• Okenọ ọmoha jọ nọ a re se Lukodi ọ jiroro nọ o re wuhrẹ Ebaibol kugbe Isẹri Jihova, ọsẹ riẹ ọ tẹ wọso gaga. Okejọ nọ Lukodi ọ jẹ ruẹrẹ oma kpahe re o kpohọ ewuhrẹ eva obọ Ọgwa Uvie na, ọsẹ riẹ ọ tẹ rehọ ọpia guegue ei. Oke ọfa jọ ọsẹ Lukodi ọ tubẹ rehọ ure fae dede, bẹre ola ulogbo fihọ uke riẹ. Makọ ọkparesuọ ọgaga nana kpobi, Lukodi o kru oma ga evaọ ọtamuo riẹ re ọ jọ omọvo Isẹri Jihova. O te gbe ru ẹnyaharo, ọ tẹ họ-ame. Ọkobaro oke kpobi ọ rọ obọnana.

Edikihẹ Lukodi o tẹ were oniọvo-ọmọtẹ ọmaha riẹ, Sona, te epanọ ọye omariẹ o ro muọ Ebaibol họ ewuhrẹ kugbe Isẹri Jihova. Rekọ re a whaha iẹe ewuhrẹ, ọsẹ rai o te vi Sona kpohọ isukulu evaọ iwhre ọfa, oria nọ Isẹri e rọ họ. Ghele na, Sona o te ruei fihọ uruemu re ọ ta kẹ amọfa kpahe eware nọ o wuhrẹ no. Fikiere, omoni riẹ jọ o te je wo isiuru.

Nọ Isẹri na evaọ iwhre ekẹloma a yo kpahe iruo usiuwoma ota Sona, a te weze bru ei ze je ru ọruẹrẹfihotọ re a he wuhrẹ Ebaibol kugbei ẹsikpobi. O te gbe ru ẹnyaharo viere yọ u ri kri hi na o te kuomagbe oniọvo riẹ wọhọ Osẹri Jihova nọ ọ roma mudhe, họ-ame no. Fiba onana, enẹna omoni riẹ ọ rọ owhowho-uvie nọ ọ te họ-ame he, a tẹ jẹ be jọ iwhre ọnana ru obe uwuhrẹ ukoko.

Ẹvẹ o rọ igbunu jẹ rọ omosasọ te nọ emaha a te kuomagbe evaọ ajiri odẹ Jihova!

[Footnotes]