Iwhowho Uvie A N’iyẹrẹ
Ithihakọ U Su Kpohọ Oghale Ọghẹnẹ Evaọ Malawi
JOSẸF ọ jọ odibo ẹrọwọ Jihova. (Ahwo Hibru 11:22) Ọ tẹ jẹ jọ ohwo akọthiho ogbunu. Dede nọ inievo obọ riẹ a vivi rie, a zẹ riẹ isiava kpohọ igbo, uwhremu na a te je gbolo iei fihọ uwou-odi fiki ota nọ a bọwo e riẹ, udu u no Josẹf awọ họ. Ukpoye, ọ rehọ odiri thihakọ uye ikpe buobu, jẹ roma kpotọ hẹrẹ oghale Jihova.—Emuhọ 37:23-28, 36; 39:11-20.
Epọvo na re, Isẹri Jihova evaọ Malawi a rehọ odiri hẹrẹ oghale Ọghẹnẹ no. Evaọ ikpe 26, Isẹri Ileleikristi enana a thihakọ awhaha egọmeti, ọwọsuọ ọgaga, gbe idabolo buobu. Rekọ ithihakọ rai o wha erere ze no!
Okenọ ukpokpoma o roma via evaọ Malawi evaọ ubrobọ urere 1967, iwhowho Uvie na i bu te ole 18,000. Dai roro oghọghọ Isẹri na nọ a ruẹ nọ ukpe iruo 1997 na u muhọ avọ unu okpokpọ iwhowho-uvie nọ o mai bu kpobi, 38,393—bu vi akuava unu nọ a jọ evaọ emuhọ awhaha na! Ofariẹ, ahwo nọ a kpohọ Okokohọ Ubrotọ “Ewhovuẹ Udhedhẹ Ọghẹnẹ” 13 nọ a jọ Malawi ru a bu vi 117,000. Uzẹme, Jihova ọ ghale ẹrọwọ gbe ithihakọ rai no.
Oriruo oghale onana họ oware nọ o via kẹ ọmoha jọ nọ a re se Machaka. Okenọ Machaka ọ rọwo nnọ Isẹri Jihova a wuhrẹ Ebaibol kugbei, eva e tẹ dha ọsẹ gbe oni riẹ gaga. A ta nọ: “Whọ tẹ gwọlọ jọ Osẹri, whọ rẹ kwa no uwou na hrọ.” Rekọ eguegue ọnana o lẹliẹ e riẹ siuke kpemu no uwuhrẹ riẹ hẹ. Fikiere, ọsẹ gbe oni Machaka a te miei iwu riẹ kpobi no. Inievo na a tẹ dẹ efa kẹe. Nọ ọsẹ gbe oni Machaka a yo onana, a tẹ ta kẹe nọ: “Otẹrọnọ Isẹri na a te tha owhẹ uke, kiyọ whọ rẹ kwa bru rai.” Nọ o roro ẹme na ziezi no, Machaka o te no uwou, uviuwou Osẹri jọ evaọ ukoko na u te fiei họ uwou.
Onana o tẹ dha ọsẹ gbe oni Machaka eva te epanọ a rọ j’iroro nọ a rẹ kwa no oyena no re a siọ Isẹri na ba ẹruẹ. Onana o ghinẹ wha edada se Machaka, rekọ ọ ruẹ omosasọ evaọ okenọ inievo na a rehọ Olezi 27:10 (NW ) t’ẹme kugbei, onọ o ta nọ: “Otẹrọnọ ọsẹ gbe oni mẹ a se omẹ, Jihova omariẹ o re si omẹ gboma.”
U kri hi, udu ọsẹ gbe oni Machaka o tẹ dina lọhọ, ọ tẹ kwa zihe kpo. Ababọ avro, ọtamuo ọmọ rai re ọ gọ Jihova u duobọ te ai udu gaga, keme a gwọlọ nọ Isẹri Jihova a wuhrẹ Ebaibol kugbe ai! A te je kpohọ Okokohọ Ubrotọ “Ewhovuẹ Udhedhẹ Ọghẹnẹ” na edẹ esa na kpobi, ukuhọ riẹ a te bo nọ: “Uzẹme, onana họ ukoko Ọghẹnẹ.”
Ẹhẹ, ọwọsuọ o sae jọ odawọ, rekọ oma o be lọhọ ewhovuẹ omarokpotọ Ọghẹnẹ hẹ. A bi tunye haro avọ udu, be riẹ nọ ‘ukpokpoma o rẹ wha ithihakọ ze; ithihakọ o vẹ wha ọjẹrehọ ze.’ (Ahwo Rom 5:3, 4) Isẹri Jihova evaọ Malawi a sai se isẹ gbagba inọ ithihakọ u re su kpohọ oghale Ọghẹnẹ.