Iwhowho Uvie A N’iyẹrẹ

Ọghẹnẹ O ru Rie Rro Evaọ Alaska

EVAỌ otọ ikulu gbe ekpalekpa-ame, ubi osese o rẹ hẹrẹ uvẹ nọ o rẹ rọ rro te urre. Evaọ usu emerae ekpẹkpẹe esa nọ u re ru ezi ivo Alaska via na, ubi ure cabbage nọ o rro te imilimita esa o rẹ rro gbẹdẹ te enwenọ ikilogramo 40! Ẹhẹ, ẹkwotọ ọnana nọ a roro vẹre nọ o rọ otọ ufofe, odhedhẹ na o be sae mọ ibi buobu.

Onana o mae rọ uzẹme kpahe udhu ẹzi evaọ Alaska. Obei, evaọ ẹkwotọ uriri ukrẹkri, Isẹri Jihova a gbẹ be kọ ibi Uvie na. Wọhọ abọ ọfa akpọ na, Ọghẹnẹ o bi ru ubi na rro evaọ idu iwoma.—1 Ahwo Kọrint 3:6, 7.

● Okenọ ọ jọ ebọso isukulu, Osẹri ọmaha jọ nọ a re se Vanessa o te muẹrohọ ibe ọmọ-isukulu riẹ jọ, Ann, ọnọ ọye ọvo ọ rẹ keria kpoko ẹsikpobi. O wọhọ nọ eva e be were Ann he, fikiere Vanessa o te zizie Ann re ọ keria kẹle iẹe. Agbẹta nọ eva e be rọ were Ann ha na! Ẹyao udu o kpe oni riẹ, yọ u kri hi ẹyao ọta o te je kpe ọsẹ riẹ. Oye jabọ nọ Ann o bi ro lele imoni riẹ rria evaọ Alaska na.

Vanessa ọ wẹriẹ uwou ogbẹnyusu ọkpokpọ riẹ okenọ ọ jọ usiuwoma Ẹdẹ-Ọmaha jọ ọ tẹ nyasiọ ibroshọ na Kọ Ọghẹnẹ Ọ Be Ghinẹ Daezọ Mai? ba kẹe. Ẹdọvo-Oka nọ u lele i rie evaọ obọ isukulu, Ann ọ tẹ gwọlọ Osẹri ọmaha na. Ann o wo enọ Ebaibol buobu, enọ Vanessa ọ sae kiyo rai. Ọ tẹ nọ inọ: “Diẹse wha re ro kpohọ iwuhrẹ rai?” Owọwọ oyena, Ann o te kpohọ ewuhrẹ ọsosuọ riẹ eva Ọgwa Uvie na.

U kri hi ọmọ ikpe 17 ọnana nọ o wo ọsẹ gbe oni hi na ọ tẹ ruẹ ‘esẹ’ gbe ‘ini’ buobu, wọhọ epanọ Jesu ọ yaa na. (Matiu 19:29) Yọ ẹvẹ o jọ oke oghọghọ te re a ruẹ Ann nọ eva e be were be hwẹ nọ ọ rehọ ame-ọhọ dhesẹ omarọkẹ Jihova riẹ via eva Okokohọ Ubrotọ “Ewhovuẹ Udhedhẹ Ọghẹnẹ” na!

● Evaọ eria imivu Edhedhẹ Alaska—eria nọ igbrẹwọ ikilomita udhusoi buobu e jọ hẹriẹ iwhre sa-sa—a rehọ ẹrupre ọ Watch Tower Society nọ u wo ijini ivẹ na rọ kọ ubi Uvie no bu vi eko 150. Rekọ ewuhrẹ Ebaibol nọ a re ro ru ẹnyaharo ẹzi o roma hwa ileta kere. Nọ ileta kere o rọ use-abọ kẹ ibuobu na, o rẹ gwọlọ nọ owuhrẹ Ebaibol na o re wo ona re o ru isiuru ọmọ-uwuhrẹ na kpokpọ. Ẹvẹ a sai ro ru onana?

Kathy o ru uwuhrẹ Ebaibol nọ o rẹ nyaharo kugbe Edna, dede nọ a be rria bu vi ikilomita 600 no ohwohwo! Ukpenọ o re kere enọ uwuhrẹ na ọvo fihọ obe, Kathy o kere obe ofa jọ sa nọ enọ e rọ, ọ tẹ nyasiọ oria ba nọ a re kere iyo na fihọ. Nọ Edna o te kere iyo na no, Kathy o ve kere zihe avọ ọkpahefihọ nọ a sai ro ru ẹme na vẹ. Kathy ọ ta nọ: “Owọwọ Edesa-Oka me fihọ kẹ ‘uwuhrẹ’ mai, yọ mẹ be daoma nọ ẹdẹ ọyena o re vo omẹ hẹ wọhọ epanọ oke nọ me re ro wuhrẹ amọfa Ebaibol u re vo omẹ hẹ na. Me re je vi ẹnvẹlopu nọ me kere adrẹse mẹ fihọ se Edna, avọ estampo nọ o riẹ. Nọ o rẹ rehọ eka ivẹ re ileta i te t’obọ na, ewuhrẹ nọ a rẹ rọ ileta ru o dina rọ kpẹlẹ kpẹlẹ.”

Dai roro oghọghọ na nọ Kathy avọ Edna a zere oma eva okokohọ ubrotọ evaọ Anchorage nọ emerae ikpe ọ ewuhrẹ ẹkwoma ileta e vrẹ no! Eva e were Isẹri na re a wo emọ-iwuhrẹ Ebaibol gbe efa nọ i wo isiuru nọ i no imivu enana ze evaọ Alaska.

Dede nọ orro o rẹ dina jọ kpẹlẹ kpẹlẹ ẹsejọ, “ibi” jọ e rẹ dhẹ vẹrẹ vẹrẹ okenọ a tẹ ruẹ elo uzẹme. Evaọ oma rai kpobi, bu vi ahwo udhusoi ekpokpọ nọ i bi jiri Jihova e be họ-ame kukpe kukpe evaọ Alaska! Ma ta nọ, “Ma yere owhẹ, Jihova,” nọ who bi ro ru ei rro!