“Wha Kru Oware Nọ Wha Wo Na Gaga”

Ẹ ko Isẹri jọ a jẹ ta usiuwoma evaọ ukoliko jọ nọ o rọ usu ikoliko 30 nọ i ru Ikoliko Cyclades ọrọ Gris via. Nọ imava rai a be ta usiuwoma evaọ iyẹrẹ na, a tẹ nyaku iporisi nọ ọ ta kẹ ai nọ a lele iei kpohọ uwou iporisi. Nọ a nwani te uwou-imuẹmu iporisi na no, a te yo edo ifonu. Ohwo nọ o bi fonu na họ ozerẹ iwhre na. Ọ ta nọ: “Me yo nọ Isẹri Jihova a rọ iwhre na.” Iporisi na ọ tẹ ta nọ: “Ẹhẹ, ivẹ e rọ etenẹ gb’omẹ.” Ozerẹ na ọ tẹ ta nọ: “Me bi siawọ ze.” Fiki epanọ ẹme na o bi do riwi, ozọ o tẹ dina mu inievo na.

Rekọ, nọ o te obei no, ozerẹ na ọ tẹ hwẹ, ọ tẹ so ai obọ, ọ tẹ kerria akaba nọ ọ kẹle iporisi na. Nọ ẹme na ọ be nyaharo na, iporisi na o te bi ru oma ẹwhẹwhọ rekọ ozerẹ na ọ kerria tou. Ọ ta kẹ iporisi na nnọ o rri Isẹri na kuoku hu, o te fibae nọ: “A rẹ sae kuyo onọ kpobi keme a jọ Isukulu Odibọgba Ọghẹnẹ wuhrẹ ai. O rẹ lọhọ re a gele akpọ na kie vi ẹrọwọ omọvo Isẹri Jihova nọ a re nwene.”

Nọ a jẹ ta usiuwoma ohiohiẹ okiokiọ riẹ inievo na a tẹ wariẹ zere ozerẹ na a tẹ nọe nnọ: “Fikieme whọ rọ jọ whẹtiẹwhẹtiẹ k’omai tere evaọ okenọ ma jẹ t’ẹme evaọ uwou iporisi na?” Ozerẹ na ọ tẹ ta nọ ọ riẹ Isẹri buobu evaọ Syros jegbe nnọ o se emagazini Uwou-Eroro Na gbe Awake! kri no. Evaọ uzẹme, ẹsebuobu ọ rehọ emagazini Uwou-Eroro Na, o te fi ei họ otọ efale, ọ tẹ rehọ iẹe k’ovuẹ riẹ evaọ ichọche. Ọ ta nọ: “Me roro nọ uzuazọ u re fioka ha me gbe wo ebe rai hi. Oware nọ o rọ ẹruore mẹ oye.”

Uwhremu na, ozerẹ na ọ tẹ ta kẹ Isẹri na nọ: “Mẹ t’ẹme jọ k’owhai. Wha kru oware nọ wha wo na gaga. Oware ovo o lẹliẹ owhai siobọno ei hi. Ẹme nọ mẹ be ta k’owhai na họ ovuẹ nọ o mai woma nọ mẹ kẹ no, yọ orọnikọ ugbunu ọvo mẹ be rọ tae he; u no omẹ udu ze.”