Iwhowho Uvie A N’iyẹrẹ

Whọ d’Obọji Evaọ Ewhowho Emamọ Usi na Ha

OKENỌ ekiotọ Europe a kaki weze kpohọ Ukiekpotọ Venezuela gbe Awae Maracaibo, yọ iwou-owhre ebiesa nọ a bọ fihọ ehru egbada evaọ ame ọkpakpafua na e vọ inueri na. O nwani tho obọ Venice, Italy, oria nọ ahwo a rẹ jọ bọ iwou rai fihọ inueri. Fikiere ekiotọ ahwo Spen na a te se oria na Venezuela, nọ otofa riẹ o rọ “Venice Ọsese.”

Nẹnẹ, orẹwho uwowoma onana u muọ oghẹrẹ iwou efa họ ẹbọ no, erọ abọ-ẹzi. Isẹri Jihova a jọ obei kọ ubi Uvie evaọ koria koria. Ivuẹvu abọ-ẹzi nọ i bi noi ze o be wha ujiro se “Olori ivuẹvu na,” Jihova Ọghẹnẹ.—Matiu 9:37, 38.

Okenọ ọsẹro ọnyawariẹ jọ o weze kpohọ ukoko jọ evaọ ẹwho Zulia evaọ ofẹ ẹkpẹlobọ-ukiediwo-ọre Venezuela, Isẹri na a te ru ọruẹrẹfihọ kẹe avọ aye riẹ re a weze kpohọ ukoliko osese ekẹloma jọ nọ a re se Toas. Okenọ ọ jẹ hẹrẹ evaọ uhie re ọ ruọ okọ irioke kpohọ ukoliko na, aye ọsẹro ọnyawariẹ na, Mery, ọ tẹ ta kẹ ogbẹnya riẹ, ọkobaro oniọvo-ọmọtẹ jọ, inọ a t’ẹme kẹ iruiruo okọ na jọ. Ọkobaro oniọvo-ọmọtẹ na ọ tẹ rọwo.

Nọ a nyabru emakaniki jọ, Mery ọ tẹ kẹe obe na Eriariẹ Nọ I Re Su Kpohọ Uzuazọ Ebẹdẹ Bẹdẹ na. O te dhesẹ uzoẹme na kẹe “Ebabọ Uviuwou nọ O rẹ kẹ Ọghẹnẹ Orro,” onọ o wọhọ nọ o were riẹ. Mery ọ tẹ ta nọ avọ obufihọ obe onana, a rẹ sai wuhrẹ Ebaibol kugbei evaọ obọ uwou riẹ. O te mi obe na, a te ru ọruẹrẹfihotọ re ohwo jọ ọ nyabru ei kpohọ obọ uwou riẹ.

U kri hi, okokohọ obọdẹ ẹdọvo ọ tẹ jọ udogbe na. Ẹvẹ u gbe Mery unu te nọ ọ ruẹ emakaniki na, Senor Nava, avọ aye gbe emaha emetẹ ivẹ riẹ! Mery ọ tẹ nọ aye na kpahe oware nọ o roro kpahe uwuhrẹ Ebaibol uviuwou na. Uyo riẹ u gbunu gaga.

Ọ ta nọ: “Me yere Jihova inọ ma riẹ uzẹme na no.” Kẹsena ọ tẹ ta nọ: “Okenọ whọ t’ẹme kugbe ọzae mẹ, yọ ọ nwane kwa se omẹ ba bru aye ọfa no obọ. Ọgbudi ọ jọ. Ẹsejọ ọ tẹ da no, o ve muọ ohọre họ, yọ o jẹ dha ahwo nọ a rọ ukoliko na eva. O je ru iruemu imizi re. Rekọ, eriariẹ Ebaibol nọ o wo no uwuhrẹ na ze u fiobọhọ kẹe ru inwene ilogbo no evaọ uzuazọ riẹ. O siobọno iruemu etọtọ riẹ kpobi no. Inwene enana i si ọsẹ gbe oni riẹ nọ a rọ ahwo Kathọlik urru gaga. Eva e be were ae inọ enẹna o zihe ruọ uvi ọzae uwou-orọo gbe ọsẹ no.”

Senor Nava ọ họ-ame evaọ 1996 yọ kẹle na o muọ iruo ọkobaro họ no. Aye riẹ, Jenny, ọ họ-ame evaọ 1997. Inwene nọ emakaniki okọ na o ru u duobọte osu ẹwho na te epanọ ọ rọ yare uwuhrẹ Ebaibol re. Ẹvẹ eva e were inievo-emetẹ na te inọ a d’obọji evaọ ewhowho emamọ usi na ha nọ a jọ uhie jẹ hẹrẹ okọ evaọ ohiohiẹ ọyena!

[Pictures on page 31]

Ẹghale emamọ usi na kugbe emakaniki okọ o wha iyẹrẹ evawere ze