Iwhowho Uvie A N’iyẹrẹ

Usiuwoma Ota ‘Evaọ ezi Owoma gbe Ezi Ukpokpoma’

OKENỌ ẹmo ọ tehe orẹwho Bosnia avọ Herzegovina, ọbẹwẹ ọ jọ idu ahwo buobu oma. Evaọ etoke ẹdawọ ọnana, Isẹri Jihova a dawo ẹgba kpobi re a rehọ uduotahawọ gbe ẹruore kẹ ahwo na. Ma jọ etenẹ sawo umutho eme jọ nọ Osẹri jọ nọ ọ jọ Sarajevo ruiruo evaọ etoke jọ o kere ze.

“Akpọ ọ rẹ gaga evaọ obonẹ, rekọ ahwo a be gaviezọ gaga kẹ uzẹme Ebaibol na. Isẹri nọ e rọ obonẹ e rọ obọdẹ oriruo evaọ ithihakọ. Evaọ ofẹ ekwakwa-iwo, a rọ iyogbere, rekọ a wo emamọ ẹzi. Enwenọ emoha nọ e rọ ukoko na kpobi a rọ ekobaro. Ọwhọ ọnana ọ be tudu họ iwhowho-uvie ekpokpọ awọ, yọ o rọ oware aghẹruẹ hẹ re a niyẹrẹ euwa 60 hayo bu viere umuọ amara ọsosuọ nọ a ro muọ usiuwoma ota họ.

“U te no usiuwoma n’uwou ruọ uwou no, ma dawo ona ofa no nọ ma re ro t’ahwo oma. Wọhọ oriruo, ma wo emamọ iyẹrẹ no evaọ ẹghale ebe Ebaibol evaọ eria ukio buobu nọ e rọ okpẹwho na.

“Ma se isẹri no re evaọ ẹsipito. Evaọ Ẹko-Iruo Esiwo Ẹyao-Udu orọ ẹsipito Sarajevo, ọnowuzou ọ ebo-imu na ọ tẹ rehọ Awake! ọrọ December 8, 1996, onọ uzoẹme riẹ o rọ ‘Ẹyao Udu—Eme A Rẹ Sai Ru?’ Ọ tẹ yare efa re ọ ghale ae kẹ edọkita efa. A tẹ kẹ Isẹri na uvẹ re a weze bru enọ e be mọ kpobi evaọ ẹko-iruo riẹ na. Fikiere, oware wọhọ auwa ọvo, a tẹ ghale bu vi emagazini 100 n’ehwa ruọ ehwa. Ibuobu enọ e be mọ na a ta nọ onana họ oke ọsosuọ kpobi nọ ohwo jọ o weze bru ai ziọ ẹsipito te kẹ ae uduotahawọ gbe ẹruore.

“Evaọ oke ofa, a rehọ izoeme emagazini nọ i kie kpahe emọ ro se Ẹko-Iruo Ẹruorote-Emọ. Ọnowuzou ọ ebo-imu na ọ tẹ jẹ rehọ Obe Ikuigbe Ebaibol Mẹ jọ fihọ ubruwou nọ a je s’obe. Enẹna ini-emọ nọ i weze bru emọ rai ze evaọ obọ ẹsipito na a rẹ sai se ikuigbe Ebaibol kẹ ae kẹdẹ kẹdẹ. A ru ọruẹrẹfihọ no re a weze bru edọkita ọnana eva obọ uwou riẹ.

“A jọ obọ Sarajevo wo isoja NATO [North Atlantic Treaty Organization] buobu nọ i no erẹwho sa-sa ze. A se emamọ isẹri kẹ enana no re. Ẹsejọ ma re tube no imoto ẹmo-ofio jọ kpohọ ọfa avọ ibroshọ na Good News for All Nations kugbe emagazini Uwou-Eroro Na gbe Awake! evaọ evẹrẹ sa-sa. A ghale bu vi emagazini 200 no evaọ ebarake egbaemo ọ Itali. Avọ igbunu, isoja ahwo Itali buobu a ta nọ a ri lele Isẹri Jihova t’ẹme ẹdọvo ho. Whaọ, ma te ko ai họ evaọ Sarajevo.

“Ẹdẹjọ omoto ẹmo-ofio ọ tẹ dhẹ fihọ akotọ edhere. Mẹ tẹ rehọ asasa mẹ kporo omoto na, osoja jọ o te no eva riẹ ze. Mẹ tẹ kẹe Uwou-Eroro Na jọ nọ uzoẹme riẹ o rọ ‘Ewhovuẹ Udhedhẹ—Amono A Rọ?’ Osoja na o te rri omẹ ọ tẹ nọ inọ, ‘Whẹ yọ omọvo Isẹri Jihova?’ Nọ me yo nọ E, ọ tẹ kuyo nọ, ‘U gbunu kẹhẹ; kọ wha rọ obonẹ re! Kọ oria jọ o rọ otọakpọ na nọ Isẹri na a rọ họ?’ ”

Pọl ukọ na ọ hrẹ nọ: “Vuẹ ovuẹ ẹme na, mu ọwhọ riẹ nọ oke ite oke.” (2 Timoti 4:2) Wọhọ inievo rai nọ e rọ akpọ na soso, Isẹri Jihova evaọ Sarajevo a bi ru ere, makọ n’ehwa rite ehwa je no omoto ẹmo-ofio rite omoto ẹmo-ofio!