Idu-Esuo I Jiri Isẹri Na

EVAỌ Cádiz, Spen, okpẹwho nọ ekọ-iyibo e rẹ kpahe ole ikilomita 500 evaọ ofẹ obọze-ukiediwo-ọre Madrid, osu jọ Doña Teófila Martínez o kere uzoẹme jọ (nọ uwoho riẹ o rọ obehru na) se Isẹri Jihova. U se nọ: “Egọmeti Cádiz rose Isẹri Jihova evaọ ovuhumuo kẹ okuomagbe gbe omodawọ rai kẹ okpẹwho ọnana.” Eme Isẹri na a ru nọ a ro wo ọghọ ọnana?

A kere eme enana evaọ ovuhumuo iruo nọ Isẹri na a ru evaọ ẹruẹrẹ abọjọ afe-aroza okpẹwho na. Evaọ urere eka buobu, Isẹri udhusoi buobu e fialoma ze re a fiobọhọ ruẹrẹ edhe obotọ elatrini ọrọ afe-aroza Carranza. Enẹna ahwo nọ e be ziọ afe-aroza na kpobi a bi wo erere no ekpọ nọ a whẹhọ gbe otọ nọ a ruẹrẹ na ze.

No anwọ okejọ ze, Isẹri Jihova a be reawere emamọ usu kugbe okpẹwho Cádiz. K’ukpe k’ukpe, egọmeti ẹwho na ọ rẹ rehọ Afe-Aroza Carranza na rọ kẹ Isẹri na kẹ okokohọ ubrotọ ẹgbukpe rai. Fikiere, eva e be were Isẹri na re a dao uthoma rai ro fiobọhọ ruẹrẹ afe-aroza na.

Rekọ, u te no iruo ugbobọ onana no, ẹsikpobi Isẹri Jihova a re weze kpohọ ikegbe okpẹwho na re a fiobọhọ kẹ ẹgbede na evaọ edhere ọfa. A bi whowho “usiuwoma” Uvie Ọghẹnẹ. Dede na, orọnikọ a bi ruiruo ẹgbede rai re ahwo a ruẹse jiri ai hi. A bi ru ai evaọ ẹmeoyo kẹ ujaje Jesu re a “vuẹ ovuẹ usiuwoma uvie na” re a je ‘ru ilele ahwo erẹwho na kpobi.’ (Matiu 24:14; 28:19) Evaọ edhere ọnana, Isẹri Jihova a rẹro nọ a bi ruiruo kẹ okegbe na ẹkwoma ewuhrẹ ahwo na eva “edhere ẹrẹreokie.”—Itẹ 12:28.