“Elehọ Ruọ Abade Evaọ Oke Ẹkporo”

KỌ WHO gbe se oware utioye na wọhọ ekpehre oke, ugheghẹ, gbe onọ o te wha okpẹtu ze? Rekọ ahwo jọ a duoma họ uyero utioye na no evaọ edhere ẹwoho. Evaọ oghẹrẹ vẹ? Thomas Fuller, okere-ebe Oyibo ọrọ ikpe-udhusoi avọ 17 na ọ ta nọ: “Whọ j’owọ evaọ okenọ ofu ọ r’owhẹ eva ha. O wọhọ elehọ ruọ abade evaọ oke ẹkporo.”

Re a le ute oware jọ evaọ okenọ ofu ọ daeva fia o rẹ sae wha iyẹrẹ iyoma ze. Oware jọ nọ o via nọ a kere fihọ Ebaibol na u dhesẹ onana via. Simiọn gbe Livai, emọ ọsẹ-ode anwae na, Jekọp, a j’owọ kpahe oniọvo-ọmọtẹ rai Daina nọ a gbadu ẹkwoma okpofu orukele nọ a mu. Oware nọ u no rie ze họ ahwo-okpe gbe eware nọ a gboro. Agbẹta nọ Jekọp o ro brukpe uruemu umuomu rai na, tanọ: “Wha wha uye se omẹ no, wha te ru omẹ zihe ruọ uleghe rọ kẹ ahwo nọ a be ria otọ na.”—Emuhọ 34:25-30.

Avọ areghẹ, Ẹme Ọghẹnẹ, Ebaibol na, ọ fodẹ edhere nọ o wo ohẹriẹ. O ta nọ: “Se ofuomuo ba, eva e gbẹ dha owhẹ hẹ, whọ rova ha, keme ofuomuo ọ rẹ wha umuomu tha.” (Olezi 37:8) Elele ohrẹ oyena o rẹ whaha imuemu ilogbo.—Ọtausiuwoma Na 10:4; je rri Itẹ 22:24, 25.