Ẹyọrọ Emamọ Odẹ

RE A roma totọ muẹrohọ emamọ oware nọ a ralọ o rẹ sae jọ oware isiuru. A te muẹrohọ iẹe ziezi, ohwo ọ rẹ ruẹ epanọ ọwena na ọ rehọ ebrọshe ẹsebuobu rọ ọbia ralọ uwoho na.

Epọvo na, a re ru emamọ odẹ, orọnikọ ẹkwoma ẹralọ ebrọshe ẹsiẹvo ho, wọhọ odẹme, rekọ ẹkwoma iruo ezi esese buobu evaọ oke thethei. Ẹhẹ, ẹmẹmera ma re ro wo emamọ odẹ ẹkwoma iruẹru mai.

Evaọ abọdekọ riẹ, a tẹ rọ ebrọshe te oria nọ u fo ho o rẹ sae raha uwoho na kpobi. Ere o rọ kpahe odẹ mai. Solomọn ovie owareghẹ na ọ ta nọ: ‘Ugheghẹ ohwo u re su ei thọ.’ (Itẹ 19:3) Oware nọ o rẹ gwọlọ kpobi họ owojẹ ugheghẹ jọ—ẹsejọhọ ofu, udi nọ a da vr’oma, hayo igberẹ-ibro ẹsiẹvo—o vẹ raha emamọ odẹ. (Itẹ 6:32; 14:17; 20:1) Fikiere, ẹvẹ u wuzou te re ma daoma wo emamọ odẹ re ma je ruiruo gaga sẹro riẹ.—Wawo Eviavia 3:5.