Ohẹriẹ-uyẹ Avọ Egagọ

“Okenọ mẹ ziọ United States evaọ 1978, me roro nnọ America o kuọ ẹbẹbẹ uyẹ riẹ họ no anwẹdẹ, inọ ahwo biebi a rọ emotọ epọvo na,” ere Mark Mathabane, okere-obe nọ a jọ South Africa yẹ ọ ta, okenọ emagazini Time ọ kiẹe riwi. “Evaọ idhere buobu, mẹ ruẹ nọ onana uzẹme. O wọhọ nnọ United States ọ rehọ ikpe udhusoi kparo vi South Africa. Avọ igbunu mẹ tẹ ruẹ nọ eware i ri nwene tere he evaọ idu ahwo.” Eme ọ lẹliẹ e riẹ wo iroro igbunu otiọye na?

“Auwa jọ evaọ usu euwa nọ a rẹ jọ hẹrioma gaga evaọ America họ ughọjọ 11 a.m. evaọ Ẹdoka,” ere Mathabane ọ ta. O muẹrohọ nnọ makọ evaọ ichọche, ahwo a be sai kuomagbe ahwo uyẹ ofa evaọ egagọ họ. “Kọ didi ẹro a re ro ri ahwo uyẹ ọfa evaọ edẹ efa oka na?” ere ọ nọ. Nọ o bo se ewuhrẹ wọhọ ifue kẹ enwene na, Mathabane ọ ta nọ: “Ewuhrẹ o re ru owhẹ rọwo nnọ ahwo-akpọ kpobi ẹrẹrẹe.”

Isẹri Jihova a rọwo inọ ewuhrẹ họ ifue na, rekọ ewuhrẹ nọ a mai fievahọ họ ọrọ Ẹme Ọghẹnẹ. Ẹhẹ, Ebaibol na o fiobọhọ kẹ ai no si ọzadhe omohẹriẹ uyẹ no—makọ evaọ ekwotọ nọ omukpahe uyẹ u je bi titi. K’oka k’oka evaọ Egwa Uvie rai, ahwo uyẹ gbe erẹwho sa-sa a bi kokohọ re a wuhrẹ ai izi gbe ehri-izi Ẹme Ọghẹnẹ, Ebaibol na. A rẹ jọ iwuhrẹ nana mi ugho ho. Ma zizie owhẹ nọ whọ nyaze!