“Ọzae Evawere ọrọ Upelẹ Aye”

ẸSEJỌ, ahwo jọ a rẹ bọwo Isẹri Jihova ota inọ a be raha erọo. Rekọ, erọo obokparọ buobu enọ omọvo orọo na ọ jẹ rọ Osẹri Jihova i dhesẹ nọ ọrue gheghe a be ta. Elele ohrẹ Ebaibol na evaọ uzuazọ uviuwou o rẹ wha erọo evawere ze, wọhọ epanọ ileta nana nọ a kporo evaọ obe-usi French na u dhesẹ.

“Evaọ enwenọ ikpe 28 na, mẹ yọ ọzae evawere ọrọ upelẹ aye nọ ọ rọ omọvo Isẹri Jihova. Ọ rehọ ẹruọsa gbe uyoyou ovo na yọrọ emọ isoi mẹ, enọ ivẹ rai e rọ eriẹ hẹ. Nọ mẹ rrọ ohwo nọ ọ be sẹro ekọmpeni avọ iruiruo 45 enẹna, mẹ rẹ sae k’owhẹ imuẹro nnọ o fiobọhọ gaga no evaọ obokparọ iruo mẹ. Fikiere okenọ mẹ ruẹ uzoẹme jọ evaọ obe-usi nọ a re vi se omẹ ẹsikpobi nọ u dhesẹ Isẹri Jihova wọhọ idudu kẹ ẹkwotọ Lot-et-Garonne, mẹ tẹ gwọlọ rọ unu mẹ se isẹri.”

Ileta nana o tẹ jẹ ta nọ: “A re vovo hayo da vroma ha. Kọ onana yọ idudu? A rọ Ileleikristi ororokẹ nọ e rẹ gba izi rai họ amọfa ha. Ukpoye, a rọ oriruo evaọ eria buobu. . . . A re fi iwhayo hayo zẹ ekpere imu hu. A rẹ y’eyaa nnọ a be rọo ho ho, yọ uzẹme riẹ họ, izuazọ rai e rọ owowa. . . .

“Wha rẹ sae nọ omẹ inọ: Kọ fikieme whọ gbẹ rọ rrọ omọvo Isẹri Jihova ha? Fikinọ o gwọlọ ẹrọwọ gbe uruemu ofuafo Oleleikristi, yọ o rẹ bẹbẹ re a jọ oma ahwo buobu nẹnẹ ruẹ iruemu itieye na.”