Iruo gbe Eriosehọ I Ru Fihọ Owowa

“ERIOSEHỌ yọ ewu owoma, rekọ orọnọ ẹsikpobi a rẹ whae he.” Enẹ okere-obe jọ nọ a se odẹ riẹ hẹ o ro dhesẹ aghare eriosehọ. Rekọ o dhesẹ nnọ a re ru ei owowa kugbe iruo iwoma.

Solomọn okere ọ Ebaibol nọ a kẹ ẹgba na o dhesẹ aghare ẹme nana. Ovie owareghẹ nana o dhesẹ eria ivẹ nọ e vrẹta nọ a rẹ whaha. Orọ ọsosuọ, o muẹrohọ nọ: “Ogheghẹ ọ rẹ rehọ abọ muoma, ọ vẹ re oma obọ riẹ.” (Ọtausiuwoma Na 4:5) Ẹhẹ, oyẹlẹ o rẹ wha uvuhu se ohwo. Fikiere, o rẹ sai fi omokpokpọ ọyẹlẹ na họ awa, makọ uzuazọ riẹ dede. Evaọ abọdekọ riẹ, ejọ e riẹ nọ i re gbabọ kẹ eware efa kpobi fiki iruo. Solomọn o dhesẹ iruo nọ a re ru ababọ eriosehọ wọhọ ‘ufofe gbe ilale ofou.’—Ọtausiuwoma Na 4:4.

Avọ emamọ ẹjiroro, Solomọn ọ tẹ kẹ ohrẹ owowa: “Ẹkuobọ ọvo nọ ọ vọ avọ udhedhẹ o woma vi ekuabọ ivẹ nọ unye avọ oma odawọ evaọ ofou” e vọ. (Ọtausiuwoma Na 4:6) U fo re ohwo ọ “re awere iruo riẹ”—koyehọ, ọ rẹ rehọ okejọ reawere ọ irere iruo riẹ na. (Ọtausiuwoma Na 2:24) Yọ u fo re eware efa e jọ uzuazọ riẹ u te no iruo no. Uviuwou mai o gwọlọ oke mai jọ. Solomọn o dhesẹ nọ owha-iruo ọsosuọ mai o rọ, orọnikọ iruo ho, rekọ ẹgọ Ọghẹnẹ. (Ọtausiuwoma Na 12:13) Kọ whọ rọ usu ahwo nọ a be reawere eriwo owowa ọ iruo?