Ẹnyate Use-Abọ Ọyewọ

ẸYỌRỌ emọ nẹnẹ, maero kọ enọ e rọ ikpe ikpegbọ na, yọ use-abọ ogaga kẹ eyewọ. Obe-usi na The Gazette ọrọ Montreal, Canada, o niyẹrẹ nọ idieda gbe ẹlọ ibimu i zihe ruọ “ẹkoma emoha no.” U fiẹgbahọ nnọ eyewọ a wo “owha-iruo nọ a re ro muẹrohotọ kpahe inwene evaọ uruemu emoha” rai.

Eme eyewọ a re rri kpohọ nọ o rẹ sai dhesẹ ebẹbẹ emoha itieye? Eka unuovẹvẹ ugboma, uruemu, gbe oyerikugbe jọ nọ American Academy of Child and Adolescent Psychiatry a duku họ ehoo okrẹkri, enwene uruemu gbe eyero, oke buobu nọ a rẹ raha siẹthẹ gb’oma, uruemu ẹwhọ, gbe ẹraha izi.

Ẹvẹ eyewọ a sae rọ thọ emọ rai no eware enwoma eyena gbe iyẹrẹ iyoma nọ e rẹ sai noi ze? Dr. Jeffrey L. Derevensky, ọrọ Yunivasiti ọ McGill, ọ rọwo inọ ẹme ọta ovevẹ gbe adhẹẹ odidi nọ a bọ họ emọ na evaọ ikpe ẹrokpako ọmaha na e rẹ sae lẹliẹ ebẹbẹ na kpotọ uwhremu na. The Gazette o fibae nnọ dede nọ isiuru kẹ mẹrẹjomẹsa o rẹ roma via evaọ oke ọmoha, emọ-uzoge a gbẹ gwọlọ “ọkpọvio, uketha, ẹkpọhọ gbe uyoyou ọsẹ gbe oni rai.” Ẹromuhọ enana e rọwo kugbe itẹ Ebaibol nọ o ta nọ: “Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.” (Itẹ 22:6) Ọghẹnẹ ọ hrẹ esẹ gbe ini inọ a jọ oriruo, egbẹnyusu, etẹme, gbe iwuhrẹ.—Iziewariẹ 6:6, 7.