Iwhowho Uvie A N’iyẹrẹ

“Wha Riẹ Ebaibol na Gaga”

OKENỌ Jesu nọ ọ jọ ikpe 12 ọ rọ aruọwha t’ẹme kẹ isu egagọ evaọ Jerusalẹm, “ẹriẹ gbe eyo riẹ o te gbe enọ i yo rie i kpobi enu.” (Luk 2:47) Epọvo na nẹnẹ, emoha idibo Jihova buobu a be gbaudu re a t’ẹme kẹ iticha gbe ibe-isukulu rai kpahe Ọghẹnẹ gbe Ebaibol na, yọ ẹsibuobu iyẹrẹ evawere i bi noi ze.

Tiffany, nọ ọ rrọ ikpe 14, ọ jọ eklase nọ a jẹ jọ t’ẹme kpahe eruẹaruẹ Ebaibol ọ ekpoka 70 ọrọ ikpe na, onọ o rọ Daniẹl 9:24-27 na. Iticha na ọ dina kaunu te awọ Ebaibol na ọ tẹ dhẹ kpohọ uzoẹme ọfa.

Oma o jẹ dina ru Tiffany ehehoo sọ ọ rẹ kpaobọ. Ọ ta nọ: “O dina jẹ k’omẹ uye nnọ a dhesẹ awọ Ebaibol na vẹ ziezi hi. Mẹ jẹ te riẹ hẹ obọ mẹ o rọ ehru no.” U gbe iticha na unu nnọ ohwo jọ o wo ẹme nọ ọ gwọlọ ta kpahe uzoẹme na, kpakiyọ o re bẹbẹ kẹ emọ-isukulu na buobu re a wo otoriẹ riẹ dede.

Nọ a kẹe uvẹ re ọ ta kpahe eruẹaruẹ na, Tiffany ọ tẹ kparoma jẹ t’ẹme n’uzou ze. Nọ o ku ẹme na họ no, eklase na kpobi ọ tẹ fọ rirẹ. Tiffany ọ jẹ dina brudu. Ẹsiẹvo na eklase na kpobi a tẹ va ruọ abọtehe.

“Whọ riẹ ta kẹhẹ, Tiffany, whọ riẹ ta kẹhẹ,” ere iticha na o je dhe ẹtẹta. Ọ feva nnọ ọ riẹ nọ eme efa e rọ awọ Ebaibol ọyena emu, rekọ Tiffany họ ohwo ọsosuọ nọ o tu dhesẹ eme na vevẹ rọ kẹe. Evaọ ekuhọ eklase na, ọ tẹ nọ Tiffany epanọ ọ rọ riẹ kpahe Ebaibol na tere.

Ọ tẹ kuyo nọ: “Fikinọ mẹ omọvo Isẹri Jihova. Ọsẹ gbe oni mẹ a dhesẹ eruẹaruẹ na vevẹ kẹ omẹ unuẹse buobu re u te ti vẹ omẹ ẹro.”

Eriariẹ Ebaibol riẹ i gbe emọ-eklase na unu re. Ọmọ-eklase na jọ ọ tẹ ta kẹ Tiffany nọ: “Enẹna mẹ riẹ oware nọ whai Isẹri Jihova wha je n’uwou ruọ uwou no; fikinọ wha riẹ Ebaibol na gaga.” Efa e tẹ yeyaa nọ a te gbẹ rehọ iẹe se ẹkoko fiki orọwọ riẹ hẹ.

Nọ Tiffany ọ ta kẹ ọsẹ gbe oni riẹ oware nọ o via, a tẹ jiroro nọ ọ rehọ obe ọ Eriariẹ Nọ I Re Su Kpohọ Uzuazọ Ebẹdẹ Bẹdẹ na rọ kẹ iticha riẹ. Nọ o ru ere je dhesẹ kẹ iticha na abọ nọ ọ f’otọ eruẹaruẹ Daniẹl na, o te mi obe na vẹrẹ vẹrẹ je yere iei.

Uzẹme, okenọ izoge Ileleikristi a tẹ rọ aruọwha t’ẹme kpahe eware nọ esẹ gbe ini rai a wuhrẹ i rai kpahe Ọghẹnẹ gbe Ebaibol na, a rẹ wha ajiri gbe orro se Jihova jẹ wha eghale se omobọ rai.—Matiu 21:15, 16.