Obọdẹ Ehaa—Kọ Whọ te Jariẹ?

EVAỌ obọdẹ ẹdẹ jọ bu vi ikpe 3,500 nọ i kpemu, Jihova Ọghẹnẹ o te ru re uviuwou ovuovo emọ Izrẹl nọ e jọ igbo evaọ Ijipti a kpe omogodẹ hayo ẹwe re a frẹ azẹ riẹ fihọ inuẹthẹ iwou rai. Evaọ asoaso ọyena, ẹnjẹle Ọghẹnẹ ọ tẹ nyavrẹ iwou nọ a kpokahọ na rekọ o te kpe emezae ọtuyẹ nọ e rọ iwou ahwo Ijipti kpobi. A te siobọno emọ Izrẹl. Evaọ ekareghẹhọ oware oyena, ahwo Ju a te je ru ehaa Ọnyavrẹ na.

Nọ Jesu Kristi ọ nwani ku ehaa Ọnyavrẹ urere na họ kugbe ikọ riẹ no, ọ tẹ rehọ emu jọ mu onọ a rẹ rọ kareghẹhọ uwhu idheidhe riẹ. Ọ rehọ ebrẹdi nọ e kare ẹvi gbe udi kẹ ikọ riẹ jẹ ta nọ: “Wha rehọ, wha re; onana họ oma mẹ.” Ọ tẹ kẹ ae egho udi ọ tẹ ta nọ: “Whai kpobi wha da e; keme onana họ azẹ mẹ orọ ọvọ na, nọ o hwẹ kẹ ibuobu fiki erọvrẹ izieraha.” Jesu ọ tẹ jẹ ta nọ: “Wha ru onana roro omẹ.” (Matiu 26:26-28; Luk 22:19, 20) Fikiere Jesu o juzi kẹ ilele riẹ nọ a hai ru ehaa uwhu riẹ.

Enukpe nana ekareghẹhọ uwhu Jesu o kie fihọ Edesa-Oka, April 19, nọ ọre o te kiediwi no. Isẹri Jihova evaọ akpọ na kpobi a ti kokohọ evaọ obọdẹ aso nana re a ru ehaa Ekareghẹhọ na evaọ edhere nọ Jesu ọ gwọlọ. Ma rovie abọ dede owhẹ re who kuomagbe omai ziọ ehaa na. Iviena nọ mi Isẹri Jihova evaọ oria ra kpahe uzedhe oke gbe oria nọ a ti kokohọ.