Iwhowho Uvie A N’iyẹrẹ

Uzuazọ Uviuwou Evawere U re Si Amọfa Bru Ọghẹnẹ

JIHOVA ọ rehọ areghẹ gbe otoriẹ buobu ghale Josẹf. (Iruẹru 7:10) Fikiere, orimuo Josẹf “ọ tẹ were Fẹro avọ idibo riẹ kpobi.”—Emuhọ 41:37.

Epọvo na nẹnẹ re, Jihova ọ rehọ ẹkwoma ewuhrẹ Ebaibol na kẹ ahwo riẹ orimuo gbe otoriẹ no. (2 Timoti 3:16, 17) Areghẹ gbe otoriẹ nana o be mọ emamọ ibi nọ a bi fi ohrẹ Ebaibol h’iruo na. Uruemu ezi rai ‘u kiehọ ẹro enọ i bi muẹrohọ iẹe no,’ wọhọ epanọ oriruo nana nọ o no obọ Zimbabwe ze na o dhesẹ.

• Aye jọ o wo erivẹ nọ e rọ Isẹri Jihova. Dede nọ Isẹri na e were riẹ hẹ, uruemu rai u je siei urru, maero kọ uzuazọ uviuwou rai. O muẹrohọ nnọ ọzae gbe aye na a bi yeri kugbe ziezi, yọ emọ rai a bi yoẹme. Oware nọ ọ mai muẹrohọ họ inọ ọzae na o you aye riẹ gaga.

Oware nọ a jọ eria Africa jọ rọwo họ ọzae o te you aye riẹ gaga, koyehọ aye na o there umu jọ kẹe re no re o ru ei fihọ “ruru.” Fikiere aye na ọ tẹ nyabru aye Osẹri na ọ tẹ nọe inọ: “Ivie whọ gbẹ k’omẹ umu nọ who there kẹ ọzae ra re na re ọzae mẹ ọ ruẹsi you omẹ wọhọ epanọ ọra o you owhẹ na?” Osẹri na ọ tẹ k’uyo nọ: “Eme jabọ, mẹ te rehọ iẹe se owhẹ uvo odẹ notha.”

Okiokiọ riẹ, oniọvo-ọmọtẹ na ọ tẹ rọ “umu” na bru ọrivẹ riẹ. Eme họ umu na? Umu na họ Ebaibol na, kugbe obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Nọ a jọ obe Eriariẹ na t’ẹme kugbe no evaọ uzoẹme na “Ebabọ Uviuwou nọ O rẹ kẹ Ọghẹnẹ Orro”, ọ tẹ ta kẹ aye na nọ: “Onana họ ‘umu’ nọ t’omẹ te ọzae mẹ ma ro ru ohwohwo ‘ruru’ na, yọ oye jabọ nọ ma je you ohwohwo gaga na.” A te muọ uwuhrẹ Ebaibol họ, aye na ọ tẹ nyaharo ziezi te epanọ ọ rọ rehọ ame-ọhọ dhesẹ omarọkẹ Jihova riẹ via.

• Ekobaro obọdẹ ivẹ nọ a vi kpohọ ukoko osese jọ kẹle uwhru ẹkpẹlobọ-ovatha-ọre Zimbabwe avọ Mozambique a kpohọ usiuwoma n’ẹthẹ ruẹthẹ hẹ evaọ eka ivẹ. Fikieme? Keme ahwo a je bru ai ze ti yo eme nọ a be ta. Ọkobaro na jọ o gbiku oware nọ o wha riẹ ze: “Ma jẹ nya ikilomita 15 k’oka k’oka re ma wuhrẹ Ebaibol kugbe ohwo jọ nọ o wo isiuru. O jọ lọlọhọ họ re ma nyate oria nana. Ma je kie ọloho, ma vẹ nya ame nọ o te omai uriohọ vrẹ. Ma rẹ wọ ehọ gbe eviẹ mai fihọ uzou, ma vẹ fa ethẹ na vrẹ, ma vẹ wariẹ ku iwu mai họ evaọ abọ ọdekọ.

“Ọwhọ mai o gbe erivẹ ohwo nọ o wo isiuru na unu. Ohwo jọ nọ o w’uzou ichọche jọ ọ jọ usu enọ i muẹrohọ omai na. Ọ ta kẹ ilele riẹ nọ: ‘Kọ wha gbẹ gwọlọ wo ọwhọ wọhọ emoha ivẹ Isẹri Jihova eyena?’ Okiokiọ riẹ, ilele riẹ buobu a tẹ ziọ uwou mai te nọ oware nọ o be k’omai ajọwha na. Fibae, evaọ eka ivẹ nọ i lele i rie, ahwo nọ a weze bru omai ze a bu te epanọ ma gbe je ro wo uvẹ nọ ma re ro there emu kẹ omobọ mai dede he!”

Omọvo enọ i weze ziọ uwou ekobaro na evaọ etoke eka ivẹ na họ osu ichọche na. Dai roro oghọghọ ekobaro na nọ ọ jẹ uwuhrẹ Ebaibol rehọ!