‘Mẹ rẹ Nya Wariẹ Agbada-Idhe Ra, O Ọnowo’
“MẸ RẸ te wozẹ abọ mẹ eva ẹrẹreokie, re mẹ nya eva [agbada-idhe] ra, O ỌNOWO.” (Olezi 26:6) Devidi Ovie anwae na ọ rehọ eme nana whowho omarọkẹ Jihova riẹ via. Rekọ, fikieme ọ jẹ te “nya wariẹ” agbada-idhe Jihova, kọ evaọ edhere vẹ?
Rọkẹ Devidi, ugogo oria egagọ Jihova họ uwou-udhu na avọ agbada-idhe riẹ nọ a rehọ ẹroo ralọ, onọ evaọ etoke esuo riẹ o jọ obọ Gibiọn, abọ ẹkpẹlobọ-ọre Jerusalẹm. (1 Ivie 3:4) T’abọ t’abọ agbada-idhe na o theri te oware wọhọ uthethe-evawọ ihrẹ, ọ kawo gaga vi agbada-idhe oruaro nọ a te ma fihọ ọgwa etẹmpol Solomọn na.a Ghele na, Devidi ọ ruẹ evawere gaga evaọ uwou-udhu na avọ agbada-idhe riẹ, onọ ọ jọ oria ehri egagọ efuafo evaọ Izrẹl.—Olezi 26:8.
A jẹ jọ agbada-idhe na dheidhe emahọ, idhe omofọwẹ, gbe idhe oruthọ, yọ evaọ Ẹdẹ Omavoro ẹgbukpe na a jẹ jariẹ dheidhe kẹ orẹwho na. Agbada-idhe ọyena avọ idhe riẹ i wo otofa kẹ Ileleikristi nẹnẹ. Pọl ukọ na o dhesẹ nọ agbada-idhe na o dikihẹ kẹ oreva Ọghẹnẹ, onọ Ọ rẹ rọ jẹ idhe nọ i fo kẹ ẹtanigbo ahwo-akpọ rehọ. Pọl ọ ta nọ: “Fiki oreva o yena o je ru omai fo uno ẹsiẹvo eva oma Jesu Kristi.”—Ahwo Hibru 10:5-10.
Okenọ a tẹ gwọlọ gbodibo evaọ agbada-idhe na, izerẹ na a rẹ wozẹ abọ rai re a ru oma rai fo. Nwani fo, Devidi Ovie na ọ wozẹ abọ riẹ “eva ẹrẹreokie” taure ọ tẹ te ‘nya wariẹ agbada-idhe na.’ Ọ rehọ “eva ezi ru eware kpobi.” (1 Ivie 9:4) Ọ gbẹ hae wozẹ abọ riẹ evaọ edhere ọnana ha, a hae jẹ egagọ riẹ—‘ẹnya riẹ wariẹ agbada-idhe na’—rehọ họ. Dede na, Devidi ọ jọ ohwo Livai he yọ o wo uvẹ-ọghọ nọ o re ro ru iruo ozerẹ eva agbada-idhe na ha. Dede nọ ovie ọ rọ, a tubẹ kẹe uvẹ re ọ ruọ ighẹ uwou-udhu na ha. Ghele na, wọhọ ọmọ Izrẹl ẹrọwọ, o yoẹme kẹ Uzi Mosis na yọ ẹsikpobi ọ jẹ hae rehọ idhe riẹ ziọ agbada-idhe na. Ọ jẹ nya wariẹ agbada-idhe na ẹkwoma uzuazọ riẹ nọ ọ rọ kpahe egagọ efuafo.
Kọ mai nẹnẹ ma rẹ sai lele oriruo Devidi? E. Ma rẹ sae wozẹ abọ mai eva ẹrẹreokie jẹ nya wariẹ agbada-idhe Ọghẹnẹ re otẹrọnọ ma fi ẹrọwọ họ idhe Jesu yọ, evaọ ‘eva efuafo gbe udu ezi,’ rehọ udu kpobi gọ Jihova.—Olezi 24:4.
[Oruvẹ-obotọ]
a T’abọ t’abọ agbada-idhe avivẹ na o theri te oware wọhọ uthethe-evawọ 30.
[Iwoho nọ e rrọ ẹwẹ-obe avọ 7]
Agbada-idhe na o dikihẹ kẹ oreva Jihova, onọ ọ rẹ rọ jẹ emamọ idhe rehọ kẹ ẹtanigbo ahwo-akpọ