Omarokpotọ Kẹ Jihova

OMAROKPOTỌ, dede nọ yọ okwakwa nọ o rọ kakao nẹnẹ na, o rọ okwakwa nọ o hẹriẹ idibo Ọghẹnẹ uzẹme na, Jihova. Ohwo omarokpotọ o re dikihẹ ga evaọ otọ edawọ jẹ dọmu o tẹ maki kri. Roro kpahọ Hẹzikaya Ovie owoma na. Ebaibol na ọ ta nọ: “U noi no, ovie ọvo nọ ọ wọhọ riẹ evaọ otọ Juda ọ jọ họ, makinọ e nọ i su no re u te te ei.” Eme o ru Hẹzikaya wo ohẹriẹ? Ọ jẹ “dhẹgbalọ ỌNOWO na whawha,” makinọ egegagọ ọghẹnẹ ọrue na, Molẹk, e wariẹ e riẹ họ. Ẹhẹ, Hẹzikaya “ọ se [Jihova] ba elele vievie he, rekọ ọ yọrọ izi” riẹ.—2 Ivie 18:1-6.

Pọl ukọ na yọ omọfa jọ nọ ọ romakpotọ kẹ Jihova. Okerefihotọ odibọgba riẹ nọ a kere fihọ Ikereakere Griki Ileleikristi na o kẹ imuẹro ziezi kpahọ egagọ ẹwẹ-kpobi ọ Pọl rọkẹ Ọghẹnẹ kẹse-kẹse. Kẹle ekuhọ uzuazọ otọakpọ riẹ, Pọl ọ tẹ sae ta kpahọ omariẹ nọ: “Mẹ họre uvi ohọre na no, mẹ dhẹ ogbohrẹ na no, mẹ yọrọ orọwọ na no.”—2 Timoti 4:7.

Didi iriruo iwoma ọ omarokpotọ ma jọ oma Hẹzikaya gbe Pọl wo! Joma raro kele ẹrọwọ rai ẹkwoma omarokpotọ rọkẹ Ọghẹnẹ Oride mai, Jihova.—Ahwo Hibru 13:7.