Fikieme Ma Jẹ Rọvrẹ?

“EKIOTỌ-ERIARIẸ a ru ekiakiẹ nọ i muhọ edhesẹ no nọ erọvrẹ ọ sae lẹliẹ udu ohwo—makọ ugboma riẹ dede—kievi je woma viere,” ere obe-usi Canada, The Toronto Star, o niyẹrẹ. Ghele na, Profẹsọ Carl Thoresen ọrọ Yunivasiti Stanford, U.S.A., ọnọ o wuzou ekiotọ Iruo Erọvrẹ Stanford na, o muẹrohọ nnọ “umutho ahwo kakao gheghe a wo otoriẹ oware nọ erọvrẹ o rọ gbe obufihọ nọ u wo.”

Uvi erọvrẹ yọ abọ ologbo ọrọ Egagọ-Ileleikristi. Iyẹrẹ ọ The Toronto Star na i dhesẹ i rie wọhọ “evuhumu nnọ a ru owhẹ thọ, who te si ofu kpobi no eva, who te wo ohrọ gbe uyoyou kẹ ọnọ o ru owhẹ thọ na.” O hẹrioma no aro nọ a re kufiẹ kẹ, iroro nọ a rẹ kpae vrẹ, hayo ẹvro oruthọ na; o tẹ jẹ hẹrioma no eyoma nọ ohwo ọ rẹ wọ fihọ uzou. Iyẹrẹ na e ta nọ usiavẹ uvi erọvrẹ họ “evedha gbe iroro iyoma nọ a re sino eva.”

Ekiotọ a ta nnọ a ti gbe wuhrẹ viere kpahe irere ugboma nọ i re no erọvrẹ ze. Ghele na, a niyẹrẹ irere abọ iroro, kugbe “okakao idhọvẹ, awaọruọ, gbe ọkora.”

Obọdẹ ẹjiroro nọ ma re ro wo erọvrẹ họ onọ a dhesẹ eva Ahwo Ẹfẹsọs 4:32 na, nọ o ta nọ: ‘Wha rọ eva elọlọhọ lele ohwo ohwo yeri, ohwo ọ rọ vrẹ ohwo, wọhọ epanọ Ọghẹnẹ ọ rọ fiki Kristi vrẹ owhai na.’ A tẹ t’ẹme kpahe erọvrẹ, gbe eware efa, a tuduhọ omai awọ re ma raro kele Ọghẹnẹ—Ahwo Ẹfẹsọs 5:1.

Ma tẹ gbọ amọfa ẹrọvrẹ okenọ u te fo nọ ma dhesẹ ohrọ o rẹ sai kpomahọ usu mai kugbe Ọghẹnẹ yoyoma. Jihova o rẹro nọ ma rọ vrẹ ohwohwo. Ma vẹ sae lẹ nọ ọ rọ vrẹ omai.—Matiu 6:14; Mak 11:25; 1 Jọn 4:11.