Iwhowho Uvie A n’Iyẹrẹ

Enọ I You Jihova A Rrọ Ghaghae Kẹe

A MUẸROHỌ Lebanọn no fikiọ eware iwoma nọ e rọ eva riẹ no anwọ oke Ebaibol ze. (Olezi 72:16; Aizaya 60:13) Eware nọ e mae jariẹ viodẹ họ irre sida ilogbo riẹ, enọ e rẹ nya eki gaga wọhọ okwakwa ebabọ fiki ewoma rai, emamọ ore, gbe epanọ e rẹ tọ te. Evaọ ikpe-udhusoi ọsosuọ na, oware nọ o mae ghare kpobi yọ onọ u no Lebanọn ze. Usiuwoma Mak o n’iyẹrẹ nọ “otu obuobu jọ enọ iyo eware ilogbo nọ [Jesu] o ru; a nya bru ei” no Taya gbe Saidọn ze, ekwotọ Lebanọn anwae.—Mak 3:7.

Epọvo na nẹnẹ, Lebanọn ọ gbẹ be mọ ibi nọ e rọ ghaghae gaga evaọ aro Jihova. Ikuigbe obotọ na i dhesẹ onana.

• A ta kẹ Osẹri uzoge jọ nọ a re se Wissam re ọ kẹ eklase riẹ ovuẹ iminiti 30 eva obọ isukulu. Wissam ọ tẹ jiroro nọ o te jọ obọdẹ uvẹ nọ o re ro se isẹri. Fikiere ọ tẹ rehọ obe na Life—How Did It Get Here? By Evolution or by Creation? rọ ruẹrẹ uzoẹme kpahe emama. Rekọ, nọ ọ ruẹ uzoẹme ẹme na, iticha Wissam ọ tẹ ta nnọ nọ uzoẹme na u wuzou tere na, Wissam ọ rẹ sai fiba oke riẹ rehọ iminiti 45 kẹ ovuẹ na.

Nọ Wissam o mu ẹme riẹ họ, iticha riẹ o te bru ẹme na dhei unu o te vi ohwo nyai se iprinsipale na. U kri hi, iprinsipale na ọ tẹ nyaze, Wissam ọ tẹ wariẹ muhọ. Nọ ọ kezọ kẹ enọ nọ Wissam ọ nọ fihọ otọ evaọ emuhọ ẹme riẹ, oma u te mu iprinsipale na, ọ tẹ ta nọ emọ-isukulu na kpobi a re wo ifotokọpi ovuẹ na.

U kri hi iticha ọfa, ọnọ ọ jẹ nya vrẹ, o te muẹrohọ omosasọ nọ o rọ eklase na ọ tẹ nọ kpahe oware nọ o be via. Nọ a vuẹe, ọ tẹ nọ sọ abọ emama hayo eghrorotha Wissam ọ rọ. Uyo nọ a kẹ riẹ họ “Emama.” Nọ ọ te riẹ nọ Wissam yọ omọvo Isẹri Jihova, iticha na ọ tẹ ta kẹ eklase na nọ: “Wha te jọ ẹme riẹ na ruẹ nọ otọkiẹ-eriariẹ o rọwo kugbe emama, orọnikọ eghrorotha ha.”

Kpakọ iticha na o wo obe ọ Creation na nọ ọ be hae rọ kẹ evuẹ evaọ yunivasiti na! Taure ọ tẹ te nyavrẹ, ọ tẹ nọ sọ ọ sae rehọ emọ eklase riẹ ze re Wissam ọ t’ẹme kẹ eklase riẹ. Oyena o tẹ wha emamọ isẹri efa se Jihova.

• Uruame uzẹme na u je kpe Nina ọnọ ọ kpako te ikpe 22. Ẹdẹjọ ọmọ oniọvo ọsẹ riẹ jọ ọ tẹ kẹe Ebaibol ọ tẹ ta kẹe nọ o kpohọ Ichọche Pẹntikostal. Nina ọ tẹ rọ omawere se Ebaibol na ọ tẹ jọ isase riẹ wuhrẹ nọ Ileleikristi a rẹ ta usiuwoma, fikiere o te muọ usiuwoma họ ẹta kẹ egbẹrioma riẹ. Ohwo kpobi nọ ọ t’ẹme kẹ ọ vẹ nọe inọ: “Whẹ yọ omọvo Isẹri Jihova?” Ẹme na ọ tẹ jẹ kẹe idhọvẹ.

Ikpe ezeza nọ i lele i rie, Isẹri Jihova i te weze ziọ uwou Nina a tẹ ta kẹe kpahe Uvie Ọghẹnẹ. Eva oke ọsosuọ, ọ daoma jẹ gwọlọ afuẹwẹ evaọ iwuhrẹ rai. Rekọ, ọ tẹ te ruẹ nọ iyo rai kpobi i wo iroro i te je no Ebaibol ze.

Eware nọ Nina o ti wuhrẹ uwhremu na—odẹ Ọghẹnẹ, Jihova; eghale Uvie na; gbe efa—e tẹ kẹe imuẹro nọ ọ ruẹ uzẹme na no. Ọ tẹ rehọ uzuazọ riẹ mudhe kẹ Ọghẹnẹ jẹ họ-ame. Anwọ ikpe ihrẹ nọ i kpemu na, Nina ọ rọ ọtausiuwoma oke-kpobi. Evaọ uzẹme, Jihova ọ rẹ ghale enọ i wo uvi uyoyou kẹe.—1 Ahwo Kọrint 2:9.