Ẹgwọlọ Okrẹkri Ọ Kẹ Erere

“JIHOVA? Ono họ Jihova?” Sylvia, ọnọ ọ rọ ikpe 8, ọ ruẹ odẹ na evaọ Ebaibol ẹvẹrẹ Armenia jọ, obe oghaghae uviuwou jọ nọ ọmọtẹ ọboba ọfa jọ o dhesẹ kẹe. Ọ tẹ nọ amọfa, rekọ uvumọ ohwo ọ riẹ hẹ evaọ Yerevan, Armenia, oria nọ ọ be rria ọnọ ọ rẹ sae ta kẹe ohwo nọ Jihova ọ rọ—makọ ọsẹ gbe oni riẹ, iticha riẹ, hayo tubọ isu ichọche na.

Sylvia ọ tẹ rro t’ohwo, ruotọ no isukulu, mu iruo họ, ghele na ọ te riẹ ohwo nọ Jihova ọ rọ họ. Nọ o t’ohwo no na, o te no Armenia, uwhremu na o te kpohọ Poland, ọ tẹ be rria ubrukpẹ osese jọ kugbe amọfa nọ ẹmo o le. Erara jọ i je weze bru ohwo jọ nọ a gbẹ j’uwou na ze ẹsikpobi. Sylvia ọ tẹ nọ inọ: “Erara enana yọ amono?” Uyo na họ: “Ahwo na yọ Isẹri Jihova, a be nyaze ti wuhrẹ omẹ Ebaibol.”

Udu Sylvia o tẹ vọ avọ oghọghọ nọ o yo odẹ na Jihova. Koyehọ ọ sai wuhrẹ kpahe Jihova enẹna gbe epanọ ọ rọ Ọghẹnẹ oyoyou te. Rekọ u kri hi o te no Poland. Ọ tẹ gwọlọ ufuoma kpobọ Denmark, abọdekọ Abade Baltic na. Umutho eware jọ ọvo ọ wha lele oma, rekọ usu rai họ ebe Isẹri Jihova jọ nọ a kporo no Ebaibol ze. Evaọ uke obe jọ, Sylvia ọ tẹ ruẹ adrẹse iwou-ogha Watch Tower Society. A rẹ rọ obe oyena zaro kẹe he—oye họ edhere nọ o re ro duku Jihova!

Evaọ Denmark, a tẹ rehọ Sylvia kpohọ evuẹ ahwo nọ ẹmo o le, ọ tẹ nwani muọ Isẹri Jihova họ ẹgwọlọ. Evaọ usu adrẹse riẹ na, ọ ruẹ nọ uwou-ogha Watch Tower Society evaọ Denmark o rọ ẹwho Holbæk. Rekọ diẹse ẹwho na ọ rọ? A jẹ rehọ itreni wọ Sylvia no evuẹ ọyena kpohọ ọfa, yọ evaọ edhere, itreni na ọ tẹ dhẹ Holbæk vrẹ! Udu riẹ o tẹ wariẹ vọ avọ oghọghọ.

Nọ oyena o vrẹ no, evaọ uvo ẹdẹjọ, Sylvia ọ tẹ ruọ itreni na zihe kpohọ Holbæk ọ tẹ nya no oria nọ itreni o re jo fi ahwo h’otọ na kpohọ uwou-ogha na. Ọ kareghẹhọ nnọ: “Nọ mẹ ruọ ogege na, mẹ tẹ keria ebẹnche jọ mẹ tẹ ta kẹ oma mẹ nọ, ‘Nọ aparadase!’ ” A dede i rie rehọ ziezi evaọ uwou-ogha na, ukuhọ riẹ o te ti wo uwuhrẹ Ebaibol riẹ.

Rekọ a je dhei n’oria ruọ oria unuẹse buobu. Okenọ a te dhei no evuẹ jọ kpohọ ọfa, Sylvia ọ vẹ gwọlọ Isẹri Jihova ọ vẹ wariẹ muọ uwuhrẹ Ebaibol riẹ họ. Ghele na, nọ ikpe ivẹ e vrẹ no, o wuhrẹ te epanọ ọ rẹ rọ rehọ uzuazọ riẹ mudhe kẹ Jihova no. Ọ tẹ họ-ame, u gbe kri hi ọ tẹ ruọ iruo-odibọgba oke kpobi na ovavo. Evaọ 1998 egọmeti Denmark o te siobọnoi.

Obọnana Sylvia ọ rọ ikpe 26 yọ o bi ruiruo evaọ oria nọ o kareghẹhọ iẹe Aparadase na, uwou-ogha Isẹri Jihova nọ o rọ Denmark. Ọ ta nọ: “Kọ eme mẹ rẹ ta? Mẹ be gwọlọ Jihova anwọ oke ọmaha. Enẹna mẹ rue riẹ no. O jọ isiuru mẹ nọ mẹ rẹ raha uzuazọ mẹ kpobi fihọ iruo riẹ, yọ enẹna mẹ rrọ eva Ebẹtẹle. Mẹ lẹ nọ etenẹ ọ rẹ jọ uwou mẹ ikpe buobu!”