Kọ Who Wo Areghẹ?

OKENỌ ọ jẹ rehọ iguẹdhọ mu kẹ Izrẹl, Mosis ọ daoma re ọ ruẹ “eketa, ahwo nọ a wo areghẹ avọ otoriẹ.” (Iziewariẹ 1:13) Orọnikọ otoriẹ nọ ohwo o re wo fikinọ ọ kpako no họ oware nọ a kaki rri hi. Areghẹ gbe orimuo i wuzou re.

Ohwo nọ o wo areghẹ ọ rẹ wawo ẹme gbe uruemu riẹ te ziezi. Wọhọ epanọ Webster’s Ninth New Collegiate Dictionary o ta, ohwo areghẹ ọ rẹ jẹ riẹ “okenọ o re ro fibo avọ areghẹ.” Ẹhẹ, oke jọ yọ okenọ “a rẹ rọ ta ẹme,” oke jọ okenọ “a rẹ rọ fọ tou,” yọ ohwo areghẹ o re vuhu ohẹriẹ na mu. (Ọtausiwoma Na 3:7) Ẹsibuobu, emamọ ẹjiroro ọ rẹ jariẹ nọ a re ro fibo, keme Ebaibol na ọ ta nọ: “No eme i re buobu, ọtathọ ọ rẹ kariẹ hẹ, rekọ ọnọ ọ rẹ yọrọ igbenu riẹ o wo areghẹ.”—Itẹ 10:19.

Ileleikristi e rẹ yọroma re a dhesẹ areghẹ evaọ usu rai kugbe ohwohwo. Orọnikọ ohwo nọ ọ rẹ mae t’ẹme hayo ọnọ ọ rẹ mai do họ ọnọ ọ mai wuzou hayo ọnọ ọ mai w’iruo ho. Kareghẹhọ, Mosis ọ jọ “ọgba ẹme,” rekọ ọ sae riẹ orẹwho Izrẹl su ziezi hi bẹsenọ o ro wuhrẹ odiri, omarokpotọ, gbe oma-oriẹsuo. (Iruẹru 7:22) Fikiere, ahwo nọ a ro mu uzou amọfa a rẹ mae daoma gaga re a kare omorro je dhesẹ ẹzi ẹme amọfa nọ a rẹ rọwo.—Itẹ 11:2.

A jọ Ẹme Ọghẹnẹ dhesẹ ahwo nọ Jesu Kristi o ro “mu uzou eware riẹ kpobi” na nọ a wo ‘ẹrọwọ avọ areghẹ.’ (Matiu 24:45-47) A be rọ okpakpa laruọ aro Jihova ha; yọ a re sienẹ h’emu hu nọ ọkpọvio Ọghẹnẹ evaọ ẹme jọ ọ tẹ rọ vevẹ. A riẹ okenọ a rẹ rọ t’ẹme gbe okenọ a rẹ rọ fọ tou kẹ oruvẹ ọfa. U re woma kẹ Ileleikristi kpobi orọnikọ re a raro kele ẹrọwọ rai ọvo ho rekọ re a je dhesẹ areghẹ, wọhọ epanọ utu ọrigbo na o bi ru na.—Ahwo Hibru 13:7.