Udhedhẹ Akpọ—Oghẹrẹvẹ?

KỌ UDHEDHẸ akpọ o kẹlino? Ere ibuobu a je roro vẹre rekọ enẹna a wo avro. Wọhọ epanọ iyẹrẹ jọ nọ e t’ẹme kpahe use-abọ obaro mai na o ta, onọ a kporo fihọ obe-usi Daily Mail & Guardian ọrọ South Africa, “aro nọ a ruẹ kpahe udhedhẹ akpọ-soso ikpe ikpe ọvo nọ e vrẹ na i zihe ruọ esia anwae no.”

Enọ i kere obe na a bi roro kpahe ẹruore nọ ọ j’oria kpobi ikpe-ikpe ọvo nọ e vrẹ na. Ẹmo Imimẹ na o kuhọ obọ, yọ ozighi ugbarugba ọ gbẹ riẹ hẹ. Oware nọ ahwo a je roro fihọ ezi akpọ ọkpokpọ, ibuobu a rẹro nọ ahwo-akpọ a te kparobọ gaga evaọ ẹhọre uvuhu, ẹyao, gbe ẹraha okegbe na. Iyẹrẹ na e ta nọ: “Eruẹaruẹ eyena i zihe ruọ ugberoro no. Ohọre o bẹre lahwe no evaọ eria nọ a rẹro rai vẹre he; uvuhu akpọ u gbe bi kpehru ọvo. Erẹwho ekpokpọ ivẹ nọ i wo ogaga egbọudu enua e roma via. Ababọ owọ nọ a be jẹ vẹrẹ kpahe ozighi ahwo-akpọ nọ o bi vihọ o raha odẹ Okugbe Erẹwho na no. Ukpenọ ahwo a wo irẹro, kọ iyiyẹ a rọ.”

Emọ-uwuhrẹ Ebaibol a vuhumu nnọ omodawọ ahwo, epanọ u re kiehọ te kẹhẹ, e rẹ sae kparobọ vọvọ họ. Eme jabọ? Fikinọ, wọhọ epanọ Ebaibol na ọ ta, “akpọ na ọsoso ọ rọ obọ ogaga oyoma na.” (1 Jọn 5:19) Nọ ọ rọ otọ ekpakpọ Setan na, a sae te rehọ akpọ na ziọ uyero Aparadase nọ Ọghẹnẹ ọ ma riẹ kẹ na ha.

Eva oke ovona, ẹruore ọ riẹ. Jihova Ọghẹnẹ ọ yaa nọ ọ te rehọ udhedhẹ akpọ ze, orọnikọ ọ te ruẹrẹ uyerakpọ ọnana họ họ, rekọ ọ te rehọ “akpọ ọkpokpọ” ze onọ “ẹrẹreokie ọ be ria.” (2 Pita 3:13) Ẹhẹ, ẹkwoma Uvie Ọghẹnẹ, a ti nwene akpọ mai na kpohọ uwou udhedhẹ, orọ evawere, onọ uzuazọ gbe iruo e jẹ te jọ oware oghọghọ ẹsikpobi kẹ ahwo-akpọ ẹmeoyo kpobi. Ofariẹ, Ọghẹnẹ ọ yaa nọ o “ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho.” Eyaa enana i no aruọruẹ odedeghe ahwo-akpọ ze he. Ukpoye, i no Ẹme Ọnọma na nọ o re kie he na ze, ọnọ ọ rẹ ta ọrue he.—Eviavia 21:4; Taitọs 1:2.