Iwhowho Uvie A n’Iyẹrẹ

A Si Ekela No Odẹ Ọghẹnẹ

ẸME Ọghẹnẹ, Ebaibol na, ọ ta nọ: “Yọrọ uruemu ezi [evaọ] udevie otu Egedhọ, re wọhọ epanọ a be ta ẹme kpahe owhai rọ iru-umuomu na, a vẹ ruẹse te ruẹ iruo iwoma rai, a vẹ kẹ Ọghẹnẹ oro eva ẹdẹ oziẹobro.” (1 Pita 2:12) Fikiere, Ileleikristi uzẹme, a be daoma yọrọ uruemu ezi re a whaha ekela nọ a rẹ wha se odẹ Jihova.

Evaọ ẹwho imivu jọ nọ ọ rọ Zambia nọ a re se Senanga, a jọ uwou iticha isukulu jọ tho iredio riẹ. Nọ orọnọ Isẹri Jihova a be hae ta usiuwoma evaọ ofẹ oyena, ọzae na ọ tẹ bọwo ae ota nnọ ae a thuji na. O te gu ẹme na kẹ iporisi, be ta nọ Isẹri na a tho iredio riẹ. Wọhọ oka-imuẹro inọ Isẹri na a nyaze uwou riẹ, o te dhesẹ omobe-ovẹvẹ jọ nọ ọ jọ otọ uwou na ruẹ. Ghele na, iporisi na a rọwo ẹme riẹ hẹ. A tẹ hrẹ riẹ re ọ nyae kiẹotọ riẹ ziezi.

Ugboma ekpako na o tẹ tuduhọ Isẹri nọ e jọ okegbe iticha na ta usiuwoma ẹdẹ ọyena re a nyai lele iticha na t’ẹme na. Inievo na jọ a tẹ nyai lele iei t’ẹme, je ru ei vẹ nnọ a gwọlọ si ekela no odẹ Jihova. Evaọ etoke ẹmeọta rai, a tẹ ta kẹ iẹe nọ a ruẹ ọmoha jọ evaọ uwou riẹ yọ a rehọ omobe-ovẹvẹ kẹe. Rono edhesẹ rai ze, iticha na o te vuhu ọmoha na. Evaọ uzẹme, ọmoha na avọ iticha na a rọ ichọche evona. Iticha na o te lele ọmoha na t’ẹme, rekọ ọ se thahethahe. Kẹsena iticha na ọ tẹ t’ẹme na kugbe ọsẹ gbe oni ọmoha na o te zihe kpohọ obọ uwou. Oware wọhọ auwa ọvo, oni ọmoha na o te zihe iredio nọ a tho na ze.

Avọ ọkora, iticha na ọ tẹ nyabru ugboma ekpako na jẹ yare erọvrẹ fiki ota ọrue nọ ọ bọwo rai. Ekpako na a rọwo unuwou riẹ rekọ a yare nnọ ọ ta uzẹme na kẹ ẹgbede na re ahwo kpobi a riẹ nọ obọ Isẹri na u te he. A te ru owhowhovia evaọ isukulu na, jẹ rehọ ere si ekela no odẹ Jihova. Isẹri Jihova a rẹ sae ruabọhọ usiuwoma ota vevẹ evaọ ẹwho na.

[Udhesẹ-oria/Uwoho nọ o rrọ ẹwẹ-obe avọ 8]

AFRICA

Zambia

[Ọnọ o wo uwoho]

Mountain High Maps® Copyright © 1997 Digital Wisdom, Inc.