Uwuhrẹ Ebaibol—Kọ U Fo K’owhẹ?

“A RE sei evaọ emu ozerẹ hẹ.” Unuovẹvẹ nana o roma via evaọ ẹwẹ-obe ọsosuọ Ebaibol ahwo Kathọlik jọ. Enẹ Kay Murdy, ọnọ o bi ruiruo evaọ Catholic Bible Institute evaọ Los Angeles, ọ ta: “Wọhọ ahwo Kathọlik, ma riẹ Ebaibol na n’otọ ze he, rekọ oyena u bi nwene.” O muẹrohọ nọ, ahwo Kathọlik a tẹ riẹ epanọ Ikereakere Efuafo na e rẹ sai kpomahọ uzuazọ rai, “a re wo ohọwo gbe uruame obọrai kẹ Ebaibol na.”

Kpahe enwene nana, emagazini na, U.S. Catholic, o wariẹ eme owuhrẹ-egagọ jọ nọ ọ ta nnọ ahwo Kathọlik nọ i kuomagbe eklase iwuhrẹ Ebaibol a ruẹ nọ “wọhọ ahwo Kathọlik a gbọ rai ogbọ anwẹdẹ, gbe nnọ efe buobu ọ rọ evaọ Ebaibol na. A gwọlọ wo efe ọyena jọ nọ a roro nọ o vru mi ai anwẹdẹ na t’obọ.”

Epanọ o rọ kpobi, didi “efe” ọ riẹ nọ ọmọ-uwuhrẹ Ebaibol ọ rẹ ruẹ? Roro: Kọ whọ gwọlọ riẹ epanọ a re ro thihakọ awaọruọ uzuazọ ekẹdẹ kẹdẹ? Ẹvẹ whọ sae rọ yọrọ udhedhẹ evaọ okegbe uviuwou na? Fikieme iruemu ethọthọ gbe oheri i je bu enẹ? Eme ọ wha riẹ ze nọ ozighi ọ jẹ vọ izoge oma nẹnẹ? A rẹ sae ruẹ iyo evaifihọ kẹ enọ enana gbe erọ idhọvẹ efa evaọ Ẹme Ọghẹnẹ, Ebaibol na, yọ e rẹ ghinẹ jọ “efe,” orọnikọ rọkẹ ahwo Kathọlik gbe Protẹstant ọvo ho rekọ jẹ rọkẹ ahwo egagọ Buda, Hindu, Muslim, Shinto, tubọ enọ e se ẹria Ọghẹnẹ gbe enọ e se eriariẹ kpahe Ọghẹnẹ dede. Wọhọ epanọ ọso-ilezi na o fi rie họ, ‘ẹme Ọghẹnẹ ọ jọ ukpẹ kẹ awọ riẹ, gbe elo kẹ edhere riẹ.’ O sae jọ ere k’owhẹ re.—Olezi 119:105.