O “Kiakọ te Urere”

EVAỌ odhesẹvia ividio 1993 jọ nọ a re dhesẹ kẹ ahwo ọkpokpọ erọ iruiruo oria nọ u w’uzou Isẹri Jihova, Lyman Alexander Swingle ọ ta iroro-eva riẹ kpahe ẹgọ Jihova via: “Whu avọ eviẹ-iruo ra nọ who ku họ!”a

Brọda Swingle nọ ọ kpako te ikpe 90 na o ru oware nọ ọ tuduhọ amọfa awọ nọ a ru na. O “kiakọ te urere.” (Matiu 24:13) Dede nọ ọ jẹ mọ, eva Edesa-Oka, March 7, o kpohọ ẹgwa Ugboma Esuo Isẹri Jihova onọ ọ jọ omọvo riẹ. Edivẹ-Oka nọ u lele i rie ẹyao riẹ ọ tẹ ga, eva 4:26 a.m., March 14, edọkita riẹ ọ tẹ ta nọ o whu no.

Lyman Swingle o muọ iruo riẹ họ evaọ oria-uzou Isẹri Jihova evaọ akpọ soso nọ o rọ Brooklyn, New York, evaọ April 5, 1930. Ọ jọ etẹe ruiruo enwenọ ikpe 71. Ọ kaki ru iruo evaọ oria nọ a rẹ jọ gba ebe kugbe, o te je ruiruo evaọ oria nọ a re jo kporo ebe, je fiobọhọ evaọ oria nọ a re jo ru ọbia nọ a re ro kporo ebe. Evaọ uzẹme, Brọda Swingle ọ raha oware wọhọ ikpe 25 evaọ oria nọ a re jo ru ọbia-ebe na. O te je ruiruo oware wọhọ ikpe 20 wọhọ omọvo ẹko-iruo ebe-ikere orọ oria-uzou na. Evaọ ikpe 17 urere uzuazọ riẹ, o ruiruo evaọ Ọfisi Okru-Igho na.

Lyman yọ ọtausiuwoma aruọwha ọrọ Uvie Ọghẹnẹ. Evaọ ikpe ọsosuọ riẹ evaọ Brooklyn, tei te ọnọ aimava a gbẹ jẹ rria uwou ovo, Arthur Worsley, a jẹ hai bi okọ Isẹri na jọ kpohọ Ethẹ Hudson. Avọ ekwakwa egba, a rẹ rehọ urere-oka buobu ro whowho ovuẹ Uvie na kẹ ewho nọ e rọ akotọ ethẹ na.

A yẹ Brọda Swingle evaọ November 6, 1910, evaọ Lincoln, Nebraska, rekọ u kri hi uviuwou na o tẹ kwa kpohọ Salt Lake City, Utah. Evaọ etẹe, 1913, ọsẹ gbe oni riẹ a te zihe ruọ Emọ-Uwuhrẹ Ebaibol, epanọ a je se Isẹri Jihova evaọ oke oyena. Evaọ ikpe buobu, iruẹme erara buobu nọ i no oria-uzou Isẹri na evaọ Brooklyn ze a jẹ hai wohọ uviuwou Swingle na, yọ ezae enana a jọ emamọ okpomahọ kẹ Lyman. Evaọ 1923, nọ ọ jọ ikpe 12, ọ tẹ họ-ame ro dhesẹ omarọkẹ riẹ kẹ Ọghẹnẹ via.

Nọ ọ jọ Brooklyn ruiruo bu vi ikpe 26 no wọhọ ọzae nọ ọ te rọo ho, uzuazọ Lyman u wo oghale gaga evaọ okenọ ọ rọo Crystal Zircher evaọ June 8, 1956. Aimava a rẹ nya siọ ohwohwo ba ha, a jẹ hai w’obọ evaọ odibọgba na kugbe bẹsenọ Crystal o ro whu evaọ 1998. Oware wọhọ ikpe esa taure o te ti whu, ẹyao okie o kie Crystal nọ u ru rie fihọ ọmo. Ẹro nọ Lyman o je ro tei kẹdẹ kẹdẹ o jọ obọdẹ oriruo omarọkẹ nọ ahwo kpobi a riẹ ziezi, maero rọkẹ ahwo nọ a jẹ hae ruẹ Lyman nọ o bi tunye akaba-ọmo na evaọ akotọ edhere okegbe na nọ Crystal o bi fi Uwou-Eroro Na gbe Awake! họ ada kẹ ahwo nọ a be nya edhere na vrẹ.

Brọda Swingle ọ jọ ọzae ọ eva ivevẹ, avọ ọriẹruo ọnọ o yeri uzuazọ nọ o lẹliẹ ahwo nọ a riẹ riẹe you riei gaga. Wọhọ ọsẹ gbe oni riẹ, o wo ẹruore Ebaibol ọrọ ẹria kugbe Jesu Kristi evaọ Uvie obọ odhiwu na, ẹruore nọ u mu omai ẹro nnọ o te rie obọ no enẹna.—1 Ahwo Tẹsalonika 4:15-18; Eviavia 14:13.

[Oruvẹ-obotọ]

[Uwoho nọ o rrọ ẹwẹ-obe avọ 18]

Brọda Swingle o ruiruo oware wọhọ ikpe 25 evaọ oria no a re jo ru ọbia-ebe

[Uwoho nọ o rrọ ẹwẹ-obe avọ 18]

Lyman gbe Crystal a jẹ nya siọ ohwohwo ba ha