O rẹ Tọ Vi Emamọ Igoru

A RẸ gwọlọ igoru gaga fiki erru gbe ẹtọ riẹ. Isiuru nọ a wo kẹe na o mae roma hwa uzẹme na inọ u re lo jẹ tọ ribri. Onana o rọ ere fikinọ ame, ofou-ẹwẹ, sulfur, gbe enwenọ eware efa kpobi e rẹ sae raha igoru hu. Eware buobu nọ a rehọ igoru ru nọ a duku evaọ ekọ nọ i zue gbe eria efa i gbe je lo nọ ikpe udhusoi buobu e vrẹ no.

Rekọ o rrọ oware isiuru inọ, Ebaibol na ọ ta nọ oware jọ o riẹ nọ o rẹ tọ viere nọ ‘o ghare vi idọloro, nọ e rẹ raha dede nọ a rọ erae dawo ae.’ (1 Pita 1:7) Igoru nọ a rehọ erae gbe eware efa “dawo,” hayo ru fo no e rẹ kare epe. Ghele na, makọ igoru nọ a ru fo no dede e rẹ raha, hayo ghrae, okenọ a te fi iei họ ame jọ nọ a re se aqua regia, ọguakugbe abasa ọrọ hydrochloric acid gbe abọvo ọrọ nitric acid. Fikiere, evaọ abọ otọkiẹ-eriariẹ, Ebaibol na e ta gba nọ e ta nọ ‘igoru e rẹ raha.’

Wo ohẹriẹ, ẹrọwọ Oleleikristi uzẹme o re ‘siwi ẹwẹ na.’ (Ahwo Hibru 10:39) Ahwo-akpọ a rẹ sai kpe ohwo nọ o wo ẹrọwọ ọgaga, wọhọ epanọ a ru Jesu Kristi na. Rekọ a kẹ enọ i wo uvi ẹrọwọ eyaa nana inọ: “Fi eva họ ri bọwo ẹdẹ uwhu, mẹ rẹte kẹ owhai etu uvie uzuazọ.” (Eviavia 2:10) Ahwo nọ a whu evaọ ẹrọwọ a gbẹ rọ ekareghẹhọ Ọghẹnẹ, yọ ọ te kpare ae. (Jọn 5:28, 29) Epanọ igoru i bu te kẹhẹ e rẹ sai ru oyena ha. Evaọ abọ nana, ẹrọwọ ọ ghinẹ ghare vi igoru gaga. Rekọ, re ẹrọwọ ọ sai wo aghare otiọye na, a rẹ dawo iẹe hrọ. Evaọ uzẹme, ‘okwakwa ẹrọwọ nọ a dawo no’ oye Pita ọ ta nọ u wo aghare vi igoru. Eva e te were Isẹri Jihova re a fiobọhọ k’owhẹ wuhrẹ Ebaibol na re whọ sae bọ jẹ yọrọ ẹrọwọ ọgaga fihọ Ọghẹnẹ uzẹme na, Jihova, gbe Ọmọ riẹ, Jesu Kristi. Wọhọ epanọ Jesu ọ ta, “onana họ uzuazọ ebẹdẹ bẹdẹ.”—Jọn 17:3.