Uwuhrẹ Rono Oriẹ Ze

“UWOHO ubiebi nọ u re siuru nọ u wo erru oghẹrẹsa.” Ere ofeme-ulogbo Ebaibol jọ u dhesẹ oriẹ nọ a re se date palm na. Evaọ etoke Ebaibol gbe inẹnẹ, date palm na ọ whẹ erru họ Ukiekpotọ Naele ọrọ Ijipti na, yọ i re fi edhedhẹ họ wariẹ ẹtẹre ame Udhude Negev na.

Wọhọ epanọ o rọ kẹ eghẹrẹ iriẹ sa-sa, ure date palm na u re dikihẹ liọliọ gaga. Ejọ i re theri te imita 30 yọ e rẹ mọ ibi te ikpe 150. Ẹhẹ, ure date palm na u re siuru evaọ eriwo yọ o rẹ mọ ibi gaga. K’ukpe k’ukpe o rẹ mọ ekru ibi buobu. Ekru ọvo o re wo bu vi ibi 1,000. Rọ kpahe ibi date, ohwo jọ o kere nọ: “Ahwo nọ . . . a re ubi oyaya date nọ a fae fihọ uko no ọvo, a rẹ sae riẹ epanọ ọkpokpọ riẹ ọ rẹ were te he.”

Nwani fo, Ebaibol na ọ rehọ ahwo jọ dhesẹ iriẹ. Re ohwo ọ sai ru eva were Ọghẹnẹ, wọhọ oriẹ nọ ọ rẹ mọ ibi, ohwo na o re wo edikihẹ ọfuafo jẹ ruabọhọ eruo iruo iwoma. (Matiu 7:17-20) Fiki onana, a rehọ iriẹ nọ a kare fihọ igbẹhẹ ru ona fihọ etẹmpol Solomọn gbe etẹmpol aruọruẹ Izikiẹl na. (1 Ivie 6:29, 32, 35; Izikiẹl 40:14-16, 20, 22) Fikiere, re Ọghẹnẹ ọ sae jẹ egagọ ohwo rehọ, ohwo o re wo oghẹrẹ ekwakwa isiuru erọ date palm na. Ẹme Ọghẹnẹ o ru rie vẹ nọ: “Okiẹrẹe ọ rẹ rua wọhọ oriẹ.”—Olezi 92:12.