Iwhowho Uvie A n’Iyẹrẹ

“Inọmba Ifonu Ọthọthọ Who Se Na”

EVAỌ Johannesburg, South Africa, Leslie avọ Caroline a jẹ rọ ifonu se isẹri kẹ ahwo nọ a be rria oria ahwo nọ a siọ iruo ba no nọ a re rrou unuẹthẹ riẹ. Umutho rai ọvo a jọ uwou yọ a dhesẹ isiuru tere he kẹ ovuẹ Ileleikristi rai, fikiere eva e were Caroline nọ aye jọ ọ tọlọ ifonu na.

Caroline ọ tẹ nọ inọ: “Whẹ họ aye B—?”

Aye na ọ tẹ rọ urru owhẹwhẹtiẹ yo nọ: “Ijo, mẹ aye G—. Inọmba ifonu ọthọthọ who se na.”

Nọ ọ ruẹ ẹwhẹtiẹ urru aye na, Caroline ọ tẹ ta nọ: “Iviena j’omẹ ta ẹme nọ mẹ jẹ te ta kẹ aye B— na k’owhẹ.” Ọ tẹ ta kpahe eghale Uvie Ọghẹnẹ nọ o be tha na. Nọ a ta mu re ọ rehọ ibroshọ Eme Ọghẹnẹ Ọ Gwọlọ Mi Omai? ro sei no, aye G— ọ tẹ nọ inọ: “Hẹrẹ tao, egagọ vẹ whọ rrọ?”

Caroline o te yo nọ “Mai Isẹri Jihova.”

“Ijo, egagọ yena ha! Me roro nọ mẹ gwọlọ ruẹ owhai hi.”

Caroline ọ tẹ be tẹzẹ iẹe anọ: “Rekọ aye G—, evaọ iminiti 20 nọ e vrẹ na, me dhesẹ ẹruore nọ ọ mai gbunu kpobi k’owhẹ no, dhesẹ oware nọ Uvie Ọghẹnẹ u ti ru kẹ ahwo-akpọ kẹle na no Ebaibol ze. Eme nana nọ who yo na i mu owhẹ gaga, whọ tẹ gwọlọ nọ whọ rẹ gbẹ riẹ viere. Kọ eme whọ ghinẹ riẹ kpahe Isẹri Jihova? Whọ tẹ be mọ, kọ emakaniki whọ rẹ nyabru? Kọ whọ gbẹ kẹ omẹ uvẹ re mẹ ta oware nọ Isẹri Jihova a rọwo k’owhẹ?”

Nọ o dhizu omojọ no, o te yo nọ: “Me roro nọ ẹme ra na ọ gba. Nyaze. Rekọ riẹ nọ whọ sai ku omẹ rẹriẹ vievie he!”

Caroline o te yo nọ “Aye G—, mẹ tẹ make gwọlọ ku owhẹ rẹriẹ dede, mẹ sai ru ere he. Jihova ọvo họ ọnọ ọ rẹ sai ru ei.”

Iweze ibroshọ nọ o ro sei na i kiehọ, aye G— (Betty) ọ tẹ rọwo nọ a wariẹ weze ze. Nọ Caroline o zihe ze, Betty ọ tẹ ta nọ ọ ta kẹ eyae nọ a rẹ gbẹ riemu kugbe nnọ o bi lele Isẹri Jihova t’ẹme. A tẹ wh’abọ h’enu nọ: “Eme jọ? Ahwo nana nọ a tubẹ rọwo Jesu hu na!”

Caroline ọ tẹ nwane kareghẹhọ Betty vẹrẹ vẹrẹ kpahe ugogo ẹme jọ evaọ eme nọ a ta whremu kpahe Uvie Ọghẹnẹ na.

Caroline ọ nọ riẹ inọ: “Ono ọ te jọ Ovie na?”

Betty ọ tẹ kuyo nọ: “Jesu.”

Caroline ọ tẹ ta nọ: “Whọ riẹ yo.” Ọ tẹ nyaharo ta nọ Isẹri Jihova a rọwo nnọ Jesu yọ Ọmọ Ọghẹnẹ, rekọ avọ Ọghẹnẹ a rrọ ẹrẹrẹ hẹ wọhọ abọjọ Esanerọvo.—Mak 13:32; Luk 22:42; Jọn 14:28.

Nọ o weze nya unuẹse jọ kakao no, a tẹ riẹ inọ dede nọ o wo oma owhẹwhẹtiẹ, oma ọ Betty o ga tere he. Evaọ uzẹme, o wo ẹyao ọta, yọ ozọ uwhu u bi mu ei. Ọ ta eva riẹ via anọ: “Dodo kọ anwẹdẹ me yo eme enana je wo ẹrọwọ rai.” Caroline ọ tẹ sasa iẹe oma ẹkwoma ikereakere nọ i dhesẹ uwhu wọhọ owezẹ udidi nọ ohwo ọ sae kparoma no ze evaọ ẹkparomatha nọ o dhesẹ kẹe. (Jọn 11:11, 25) Eme nana e wha Betty udu ga, ọnọ ọ be reawere obe uwuhrẹ Ebaibol ikẹse kẹse enẹna. Ẹyao riẹ na ọvo ọ be whaha iẹe ekpohọ iwuhrẹ eva Ọgwa Uvie na.

Caroline ọ ta nọ: “U mu omẹ ẹro nọ enjẹle e be kpọ iruo nana. ‘Ethobọ me ro fonu’ ọ Betty, yọ rri, ọ kpako te ikpe 89 no!”—Eviavia 14:6.