Ẹvẹ Whọ Sae Rọ Zọ Vrẹ Urere Akpọ Nana?

EBAIBOL i dhesẹ ekuhọ uyerakpọ nana wọhọ “ẹdẹ ofu, ẹdẹ uye gbe evedha, ẹdẹ ọraha gbe idhọvẹ, ẹdẹ ebi gbe ozọ, ẹdẹ ẹgho gbe ebi ọlala.” (Zefanaya 1:15) Evaọ uzẹme, onana o rrọ oghẹrẹ ẹdẹ nọ whọ rẹ gwọlọ rẹro riẹ hẹ! Ghele na, Pita ukọ na ọ hrẹ ibe Ileleikristi re a “hẹrẹ je . . . rẹro ẹtha ẹdẹ Ọghẹnẹ vẹrẹ vẹrẹ, keme eva oyena ihru e jẹ te wara e vẹ to, ekwakwa na erae e vẹte ghra ae no! Rekọ wọhọ epaọ eya riẹ, ma rẹ hẹrẹ ihru ekpokpọ avọ akpọ ọkpokpọ enọ ẹrẹreokie ọ be ria.”—2 Pita 3:12, 13.

Orọnikọ Pita ọ be jọ etenẹ ta kpahe ọraha ihru gbe akpọ gheghe na ha. “Ihru” gbe “akpọ” nọ Pita ọ jọ etenẹ ta kpahe na i dikihẹ kẹ egọmeti ogbekuo ahwo-akpọ gbe okegbe ahwo nọ a se Ọghẹnẹ. “Ẹdẹ Ọghẹnẹ” ọ te raha otọakpọ na omariẹ hẹ, rekọ o ti “kpe ahwo omuomu na noi no.” (Aizaya 13:9) Rọkẹ enọ i “bi dimẹ je bi bo fiki eware oma-uzue” nọ a bi ruẹ evaọ okegbe omuomu ahwo-akpọ inẹnẹ na, ẹdẹ Jihova ọ rẹ te jọ ẹdẹ esiwo.—Izikiẹl 9:4.

Kọ ẹvẹ ohwo jọ ọ sae rọ zọ evaọ “ẹdẹ ologbo avọ idudu ỌNOWO na”? “Ẹme ỌNOWO na” nọ ọ ta via kẹ ọruẹaro riẹ jọ ọ k’uyo onọ na: “O rẹ te jọ nọ kohwo kohwo nọ o se odẹ [Jihova, NW ] a re ti siwi ei.” (Joẹl 1:1; 2:31, 32) Eva e te were Isẹri Jihova re a fiobọhọ k’owhẹ wuhrẹ oware nọ u dhesẹ re a se odẹ Jihova.