Ọ Kpako Vrẹ Ewuhrẹ Hẹ

KSENIYA A YẸ Kseniya evaọ 1897. O wo emetẹ esa, ọmọzae ọvo, emọ-iruọmọ 15, emọ-iruọmọ isiava 25. Evaọ uzuazọ riẹ kpobi o ru lele oware nọ ọsẹ gbe oni riẹ a wuhrẹ i riẹ. Dede nọ ọ dhẹ ohrẹ-ẹmo ziọ Moscow no obọ Abkhaz Republic ze, onọ o rrọ udevie Abade Obiebi gbe Caucasus na, uzuazọ riẹ o vọ riẹ eva, maero kọ oware nọ o se ukuoriọ egagọ nọ o wo.

Evaọ 1993, ọmọtẹ Kseniya, Meri, o te zihe ruọ omọvo Isẹri Jihova. Meri o te muọ Kseniya ẹme họ ẹtakẹ kpahe Jihova Ọghẹnẹ gbe Ebaibol na, rekọ ọ gwọlọ gaviezọ họ. Kẹse kẹse Kseniya ọ rẹ ta kẹ ọmọtẹ riẹ nọ, “Mẹ kpako vrẹ ohwo nọ o re wuhrẹ oware okpokpọ no.”

Ghele na, ọmọtẹ riẹ Meri; aye ọmọ-oruọmọ riẹ Londa; gbe emọ-iruọmọ isiava riẹ Nana avọ Zaza, enọ i zihe ruọ Isẹri Jihova no, a tẹ jẹ ta kẹe ẹsikpobi kpahe Ebaibol na. Owọwọ ẹdẹjọ evaọ 1999, a te se ikereakere jọ kẹ Kseniya onọ u duobọ tei udu. Oria na u wo eme ọwhọ nọ Jesu ọ ta kẹ ikọ ẹrọwọ riẹ okenọ ọ rehọ Emu Owọwọ Olori na mu. (Luk 22:19, 20) Nọ ọ jọ ikpe 102, Kseniya ọ tẹ jiroro evaọ owọwọ yena re o muọ Ebaibol họ ewuhrẹ.

Kseniya ọ ta nọ: “Mẹ rria ikpe 102 no, obọnana mẹ tẹ te riẹ otofa uzuazọ. Enẹna me vuhumu no inọ oware nọ u woma vi ẹgọ Ọghẹnẹ ogbunu mai na, Jihova, o rrọ họ. Mẹ gbẹ rrọ jajaja yọ me re rri oware mu. Mẹ rẹ sai se ababọ ẹno yọ oware kpobi nọ uviuwou mẹ u bi ru mẹ rrọ etẹe.”

Evaọ November 5, 2000, Kseniya ọ tẹ họ-ame. Ọ ta nọ: “Mẹ rọ uzuazọ mẹ kẹ Jihova no re mẹ rọ uyoyou gọe. Me re fi emagazini gbe ebe-evẹvẹ họ ada nọ mẹ tẹ keria oria nọ imoto e rẹ jọ wọ ahwo kẹle uwou mẹ. Imoni mẹ a re weze ze ẹsikpobi, yọ mẹ rẹ rọ evawere ta uzẹme kpahe Jihova kẹ ae.”

Kseniya o bi rẹro ẹdẹ nọ ‘oma riẹ u ti ro zihe ruọ oboba wọhọ oma ọmaha, re o zihe ruọ ọmoha avọ ogaga epaọ oke ọsosuọ riẹ.’ (Job 33:25) Otẹrọnọ ohwo nọ ọ kpako vrẹ ikpe udhusoi no ọ rẹ sai wuhrẹ otofa uzuazọ rono Ebaibol na ze, kọ ẹvẹ kpahe owhẹ?