‘Ai Kpobi A te Whu’

“Ame o te le ai; a te diwi kpo obọ edidi wọhọ utho.”

MOSIS avọ emọ Izrẹl a rehọ eme nana suole ru ehaa esiwo rai no Abade Ọwawae na gbe ọraha ewegrẹ rai ahwo Ijipti nọ i je le ai—Fẹro avọ ogbaẹmo riẹ.—Ọnyano 15:4, 5.

Rọ kẹ ohwo kpobi nọ ọ ruẹ oware igbunu oyena, uwuhrẹ na u je vevẹ. Uvumọ ohwo ọ sae wharo dadamu kẹ udu-esuo Jihova re ọ jọ uzuazọ họ. Rekọ umutho emerae jọ ọvo e vrẹ no, ikpahwo Izrẹl—Kora, Detan, gbe Abiram, gbe ethuke 250—a keke aro fihọ wọso udu-esuo nọ Ọghẹnẹ ọ rọ kẹ Mosis gbe Erọn.—Ikelakele 16:1-3.

Wọhọ epanọ Jihova ọ ta kẹe, Mosis ọ vẹvẹ emọ Izrẹl unu re a kẹnoma no uwou-udhu otu ọwọsuọ na. Detan gbe Abiram, avọ ahwo iviuwou rai nọ a dikihẹ ai emu, a tẹ rọ uzou-uveghe se nnọ a re nwene he. Mosis o te whowho nnọ evaọ edhere obọ Riẹ, Jihova o ti ru ei vẹ kẹ ahwo na inọ ezae enana “a jẹ ỌNOWO na kufiẹ.” Jihova o te rovie otọ oria nọ a dikihẹ na. “Fikiere ae avọ eware nọ a wo kpobi a tẹ ruotọ ọkpokpọ kpo obọ Ẹri otọ u je ruru ae.” Ko ẹvẹ kpahe Kora avọ otu ọwọsuọ edekọ na? “Erae i te no obọ ỌNOWO na ze, e tẹ mahe ahwo egba ivẹ, gbe ikpe isoi nọ i je dhidhe insẹnse na.”—Ikelakele 16:23-35; 26:10.

Fẹro avọ ogbaẹmo riẹ, gbe otu ọwọsuọ na evaọ igbrẹwọ na, aikpobi a whu keme a se nnọ a re vuhu udu-esuo Jihova gbe isiuru nọ o wo kpahe iruẹru ahwo riẹ mu. Fikiere o rrọ oware okpakpata kẹ enọ e te ruẹ uketha Jihova evaọ edẹ urere ebẹbẹ nana kpobi re a wuhrẹ kpahe je yoẹme kẹ Jihova wọhọ “Oride” gbe “Erumeru” na. Ere oruo, a rẹ sai wo udu no eme ọ imuẹro Jihova enana ze: “Eno-ivẹ gbe abọ, i re ti kie fihọ abotọ ra, eno-udhe gbisoi eva obọze ra; rekọ i re ti fou kẹle owhẹ hẹ. Ibiaro ra evo who re ti ro riwẹ whọ vẹ te ruẹ osa otu omuomu na. Kemena who ru ỌNOWO họ oria adhẹzọ ra, who ru Oride na re ọ jọ oria ẹria ra.”—Olezi 91:1, 7-9.