‘Ẹme Ọghẹnẹ O w’Ẹgba’ — UWOU-EBE ITANẸTE ọrọ Uwou-Eroro

Iwhowho Uvie A n’Iyẹrẹ

‘Ẹme Ọghẹnẹ O w’Ẹgba’

EVAỌ ukoliko ọ Caribbean orọ Jamaica nọ uvo o rẹ jọ rro gaga, ahwo buobu a riẹ kpahe Ebaibol na. A rẹ jọ enwenọ uwou kpobi ruẹ Ebaibol ọ King James Version na, yọ ahwo jọ a ruẹ no inọ ‘ẹme Ọghẹnẹ ọ rrọ uzuazọ avọ ẹgba.’ (Ahwo Hibru 4:12) Ẹgba nana ọ sai nwene izuazọ, wọhọ epanọ oriruo obotọ na o dhesẹ.

Ọzae jọ nọ a re se Cleveland ọ nwani kpo n’iruo t’uwou no omọvo Isẹri Jihova jọ ọ tẹ ziọ uwou riẹ. Nọ o se eria Ikereakere jọ kẹe no, Osẹri na ọ tẹ nya siọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ ba kẹ e. Cleveland ọ riẹ epanọ Ẹme Ọghẹnẹ ọ te jọ uzuazọ riẹ w’ẹgba te he.

Cleveland ọ jẹ hae lẹ isiasa okpẹdẹ vẹre, yare Ọghẹnẹ re o fi obọ họ kẹ e ruẹ emamọ edhere nọ ọ rẹ rọ gọe. U mu Cleveland ẹro inọ ọsẹ gbe oni riẹ a be gọ evaọ emamọ edhere he, rekọ nọ ọ kiẹ egagọ efa riwi no, oyẹlẹ o tẹ ruẹ e oma. Dede nọ o yo kpahe Isẹri Jihova no vẹre, ọ tẹ nọ sọ a wo uzẹme na. Dede nọ o wo avro jọ, Cleveland ọ rọwo inọ Osẹri nọ ọ ziọ uwou riẹ na o wuhrẹ Ebaibol kugbe i. Fikieme? Fikinọ ọ gwọlọ dhesẹ ẹthọthọ Isẹri na via!

U kri hi Cleveland ọ tẹ ruẹ nọ usu ọfariẹ-ogbe nọ o wo kugbe eyae ivẹ sa-sa na o be dha Ọghẹnẹ eva. (1 Ahwo Kọrint 6:9, 10) Nọ o wuhrẹ isiava ọvo no, ọ tẹ gbaudu nyasiọ eyae na ba. O te je muọ iwuhrẹ Ileleikristi họ ẹnya evaọ obọ Ọgwa Uvie na. Rekọ onana o tẹ jọ odawọ ofa.

Cleveland ọ nya diwi no evaọ utu ọ obọro ofa ọ ẹwho riẹ, yọ obọro ofa na u bi kpomahọ ewuhrẹ ọnya riẹ. Eme o re ru? Makọ eme nọ utu ọ obọro ofa riẹ, osu rai, gbe egbẹnyusu riẹ a rọ fae ova, Cleveland ọ tẹ jiroro nọ o re no usu na. Ẹhẹ, Ẹme Ọghẹnẹ o mu ẹgba họ ewo no evaọ oma riẹ, bi nwene iei kpohọ abọ ewoma!

Ẹgba Ẹme Ọghẹnẹ o te je mu oma họ edhesẹ via okenọ Cleveland o muọ eriariẹ Ebaibol na họ ẹghale kugbe amọfa. (Iruẹru 1:8) Fikiere, imava evaọ utu ọ obọro ofa riẹ a te muọ iwuhrẹ Isẹri Jihova họ ẹnya. Okenọ Cleveland o te kẹ usiuwoma ota no, ọ ruẹ oghọghọ ulogbo evaọ odibọgba na, be rehọ Ẹme Ọghẹnẹ fi obọ họ kẹ amọfa.

Avọ ẹgba Ẹme Ọghẹnẹ nọ o gbẹ be wọ e, Cleveland ọ tẹ te rọ ame-ọhọ dhesẹ omarọkẹ riẹ kẹ Jihova via yọ enẹna o wo uvẹ-ọghọ nọ o bi ro ruiruo wọhọ ọgbodibo oke-kpobi gbe odibo oruiruo evaọ ukoko na.

Evaọ Jamaica gbe evaọ akpọ na soso, idu ahwo buobu a wuhrẹ no inọ Ẹme Ọghẹnẹ ọ ‘ghinẹ rrọ uzuazọ avọ ẹgba.’

[Udhesẹ-oria/Uwoho nọ o rrọ ẹwẹ-obe avọ 3]

JAMAICA

[Ọnọ o wo uwoho]