‘Wha Rọ Vrẹ Ohwohwo n’Eva Ze’

KỌ WHỌ rọwo nọ Ọghẹnẹ ọ rọ izieraha ra vrẹ owhẹ no? Evaọ obọ United States, o wọhọ nọ ahwo buobu nọ e kpako no a rọwo ere. Dr. Loren Toussaint, ọnọ ọ karo eva ekiakiẹ nọ a jọ Oria Ekiakiẹ Oyerikugbe ọrọ yunivasiti ọ Michigan ru, ọ n’iyẹrẹ nọ evaọ usu ahwo America 1,423 nọ a kiẹ riwi, enwenọ ahwo 80 evaọ udhusoi enọ e kpako vrẹ ikpe 45 no a rọwo inọ Ọghẹnẹ ọ rọ izieraha rai vrẹ rai no.

Rekọ o rọ oware isiuru inọ evaọ usu ahwo nọ a kiẹ riwi na, ahwo 57 evaọ udhusoi ọvo a ta nọ a rẹ rọ vrẹ amọfa. Unu ahwo yena o kareghẹhọ omai eme ọ Jesu evaọ Ovuẹ obọ Ugbehru na: “Rekọ wha tẹ rọ vrẹ e nọ i ru owhai thọ, Ọsẹ rai nọ ọ rọ obọ odhiwu ọ rẹ rọ iruthọ rai vrẹ owhai re; rekọ wha gbẹ rọ iruthọ ahwo vrẹ ae he, Ọsẹ rai ọ rẹ rọ iruthọ rai vrẹ owhai gbe he.” (Matiu 6:14, 15) Ẹhẹ, re Ọghẹnẹ ọ rọ vrẹ izieraha mai, evaọ abọ jọ, o roma hwa amọfa nọ ma rẹ rọ vrẹ.

Pọl ukọ na ọ kareghẹhọ Ileleikristi nọ e jọ Kọlọsi ehri-uzi nana. Ọ ta udu họ ae awọ nọ: “Whai ohwo o thi-akọ kẹ ohwo, re ohwo jọ o te wo eguago kpahe ọrivẹ riẹ, jọ ọrọ vrẹe; wọhọ epanọ Ọnowo na ọ rọ vrẹ owhai na ere wha rẹ rọ vrẹ re.” (Ahwo Kọlọsi 3:13) Uzẹme, onana o lọhọ eru ẹsikpobi hi. Wọhọ oriruo, otẹrọnọ ohwo jọ ọ rehọ unu raha owhẹ, o rẹ jọ bẹbẹ re whọ kpa iroro vrẹ ẹme na.

Ghele na, irere nọ i re no erọvrẹ ze i re buobu. Dr. David R. Williams, owuhrẹ-oyerikugbe, ọ ta kpahe ekiakiẹ riẹ nọ: “Ma ruẹ no nọ ẹrọvrẹ amọfa gbe omokpokpọ nọ a re wo evaọ udevie ahwo America nọ e dina kpako no e wọhọ okọ gbe uvi.” Onana o rọwo kugbe eme ọ Solomọn Ovie areghẹ na, ọnọ o kere oware wọhọ ikpe 3,000 nọ i kpemu no inọ: “Udu udhedhẹ [o] rẹ kẹ iwo uzuazọ.” (Itẹ 14:30) Nọ ẹzi erọvrẹ ọ rẹ wha emamọ usu kugbe Ọghẹnẹ gbe erivẹ mai ze na, ma wo uvi ẹjiroro nọ o rẹ lẹliẹ omai rọ vrẹ ohwohwo no udu ze.—Matiu 18:35.