Kọ U Fo re Whọ Rehọ Eware Lọlọhọ?

IBUOBU e rẹ rehọ iẹe wọhọ ujiro re a dhesẹ ai wọhọ ohwo nọ ọ rẹ rehọ eware lọlọhọ, ọnọ o re dhuoma ha, nọ ọ rẹ kpọ unu hu. Rekọ, re a rehọ eware lọlọhọ u wo abọ ọfa re. Ebaibol ọ ta nọ: “Seba-esegboja otu igheghẹ u re ti kpe ai.” (Itẹ 1:32, NW ) Eme oyena u dhesẹ?

Ebaibol efa e fa ubiẹme Hibru ọsosuọ na wọhọ “ababọ osegboja” (American Standard Version), “ọjẹfiẹ” (Ebaibol Ẹri Na), gbe “ababọ-ezọdawo.” (The New English Bible) Evaọ abọ nana, re a rehọ eware lọlọhọ u w’obọ kugbe oyẹlẹ gbe ababọ omakokohọ, fikiere a rẹ sae rehọ iẹe wọhọ etukẹ hayo ugheghẹ.

Evaọ ikpe-udhusoi ọsosuọ, Ileleikristi evaọ ukoko Laodisia a riẹ hayo jẹ daezọ kpahe ehoo abọ-ẹzi rai hi. A seha avọ omoya nnọ “eware nọ mẹ guọlọ eva akpọ na kpobi me wo rai gba no.” Jesu Kristi ọ kpọ rai vi, bo se ai re a ru ọwhọ Ileleikristi rai kpokpọ.—Eviavia 3:14-19.

Uruemu ababọ-ezọdawo o jọ ahwo edẹ Noa oma re. A rọ oma kpobi kẹ ilale eware akpọ na, “a jẹ re, a jẹ da, a jẹ rọwo, a jẹ rehọ kẹ rọwo, . . . a riẹ hẹ bẹsenọ ẹvo ọ rọ ze, ọ jẹ rehọ ai kpobi vrẹ.” Jesu o te fibae nnọ: “Ere ẹtha Ọmọ ohwo ọ rẹ te jọ.”—Matiu 24:37-39.

Eruẹaruẹ Ebaibol nọ i rugba no i dhesẹ nọ ma be rria etoke “ẹtha Ọmọ ohwo” na, Jesu Kristi. Ajọ ma wo uruemu ababọ-ezọdawọ họ, uruemu ababọ osegboja, orọ ọjẹfiẹ—re a rehọ eware lọlọhọ evaọ oghẹrẹ nọ u fo ho.—Luk 21:29-36.